ગાંધીધામમાં ફરજ બજાવતા રેલવેના લોકો પાયલટ પુરણસિંહ ચૌહાણની પત્ની રાધાબેન ચૌહાણે ડિસેમ્બર ૨૦૧૨માં ગાંધીધામના મહાકાલી જ્વેલર્સના પ્રફુલ્લ જયંતીભાઈ સોની (રહે. ચાવલા ચોક) અને બિપીનભાઈ બાબુભાઈ આડેસરા (સોની) સામે છેતરપિંડી વિશ્વાસઘાત, ધમકી આપ્યા અંગે એ ડિવિઝન પોલીસ સ્ટેશનમાં ફરિયાદ  નોંધાવેલી.

રાધાબેને આ ઘરેણાં પરત માગ્યા ત્યારે આરોપીઓએ પરત નહોતા કર્યાં અને મારી નાખવાની ધમકી આપેલી. પોલીસે ઈપીકો કલમ ૪૦૬, ૪૨૦, ૫૦૬ (૨) અને ૧૧૪ હેઠળ બેઉ સામે ફરિયાદ નોંધી હતી.

મુદ્દામાલ પાવતીમાં જપ્ત ઘરેણાંની વિગત અને મૂલ્ય લખવામાં આવેલું.

આ કેસમાં આરોપી પ્રફુલ્લ સોનીએ ફરિયાદીને ૩.૫૦ લાખ રૂપિયા આપીને સહમતિથી સમાધાન કરેલું. કૉર્ટમાં ફરિયાદી રાધાબેને સંમતિથી સમાધાન થયું હોવાનું અને પોલીસે જપ્ત કરેલો મુદ્દામાલ પ્રફુલ્લ સોનીને પરત અપાય તેની સામે કશો વાંધો ના હોવાનું નિવેદન આપેલું. ૨૧-૦૮-૨૦૨૫ના રોજ ગાંધીધામના અધિક ચીફ જ્યુ. મેજિસ્ટ્રેટ એમ.બી. ભાવસારે બેઉ આરોપીને નિર્દોષ જાહેર કરીને જપ્ત થયેલો મુદ્દામાલ પ્રફુલ્લ સોનીને પરત આપવાનો પોલીસને હુકમ કરેલો.

પ્રફુલ્લભાઈ કૉર્ટનો હુકમ લઈને મુદ્દામાલ પરત લેવા પોલીસ સ્ટેશન પહોંચ્યા ત્યારે પોલીસે મુદ્દામાલ ખોવાઈ ગયો હોવાનું અથવા ક્યાંક આડોઅવળો મૂકાઈ ગયો હોવાનું જણાવી સોનાનો ઢાળિયો પાછો આપ્યો નહોતો. અરજદારે આ અંગે પૂર્વ કચ્છ એસપીને રજૂઆત કરતાં તેમણે અંજાર DySPને ઈન્કવાયરી સોંપેલી. DySPએ પણ મુદ્દામાલ મળતો ના હોવાનું જણાવી જવાબદાર અધિકારી સામે ખાતાકીય પગલાં લેવાની ભલામણ કરતો રિપોર્ટ રજૂ કરેલો.

નીચલી કૉર્ટે કરેલા હુકમનો અનાદર કરીને પોલીસ મુદ્દામાલ પરત કરવામાં હાથ અધ્ધર કરી દીધા હોવાનું જણાવી અરજદારે એડવોકેટ એ.એ. ઝાબુઆવાલા વતી ગુજરાત હાઈકૉર્ટમાં કન્ટેમ્પ્ટ પિટિશન દાખલ કરી છે.

સરકારી વકીલે વધુ એક સપ્તાહનો સમય માંગતા હાઈકૉર્ટે કેસની આગામી સુનાવણી ૨૮ ઓક્ટોબરે નિર્ધારિત કરી છે.