પરિવારના મોભી શામજીભાઈ રાયમલભાઈ કોલીએ પોલીસને જણાવેલું કે તે પત્ની અને બાળકો સાથે વાડીએ રહેતા હતા. સંતાનમાં ૩ પુત્ર અને ૬ દીકરી હતી. બનાવના દિવસની સવારે તેમના મોટા દીકરા મનજીને વાડીના પાણીના હોજ પાસે લીમડાના ઝાડ પાસેથી નાગપાલ કંપનીનો એક રેડિયો મળેલો. રેડિયો ભુંગામાં લઈ આવેલો.

સવિતાના ત્રણેક વર્ષ અગાઉ રાપરના ભીમાસર (ભુટકિયા)ના લવજી સંગ્રામ કોલી સાથે લગ્ન થયેલાં. લગ્નમાં મનમેળ ના આવતાં સવિતા પિયરે રીસામણે બેઠેલી અને સાત માસ અગાઉ તેના સામાજિક રાહે છૂટાછેડાં થયેલાં. રેડિયોને જેમનો તેમ મૂકી રાખી શેઠ આવે ત્યારે તેમને આપી દઈશું તેમ કહીને શામજી બીજા પુત્ર બચુને જીરુના પાકમાં જંતુનાશક દવા છાંટવામાં મદદ કરવા જતો રહેલો.

પોલીસની તપાસમાં સ્પષ્ટ થયેલું કે સવિતાથી છૂટાંછેડા થવાની અદાવતમાં પૂર્વ જમાઈ લવજી કોલીએ જ રેડિયો બ્લાસ્ટ થકી સવિતા અને તેના પરિવારને મારી નાખવાનું કાવતરું ઘડેલું.

અંજાર પોલીસે લવજી સામે ગુનો નોંધી તેની ધરપકડ કરેલી. તપાસમાં બહાર આવેલું કે લવજીએ શિવલખા વાંઢ (કિડિયાનગર, રાપર)ના વણવીર હરિભાઈ રાઠોડ પાસેથી કૂવો ગાળવા યા ડુંગરની શિલા તોડવા માટે વપરાતો વિસ્ફોટક ટોટો મેળવેલો.

બનાવના આઠ-દસ માસ અગાઉ લવજી આ જ લીમડાના ઝાડ નીચે ઝેર ભેળવેલું તેલ, ખાંડ, ચા અને કેરી મૂકી ગયેલો. જો કે, તેમાંથી વાસ આવતી હોઈ શામજીભાઈએ આ ખાદ્યપદાર્થો વાડીમાં ખાડો કરીને દાટી દીધેલાં. પોલીસે ઘટનાસ્થળની તપાસ કરતાં ચાર બીડી મળી આવેલી.

લવજી જે પ્લાસ્ટિકની થેલીમાં રેડિયો લઈને આવેલો તે થેલી પોલીસે કબજે કરેલી. ઘટનાસ્થળ આસપાસ માનવ પગલાંની છાપ મળતાં પોલીસે પગીની મદદ લઈને લવજીએ પહેરેલાં ચંપલ સાથે સરખાવતાં તેની સાથે સામ્યતા મળી આવેલી. ડેમોન્સ્ટ્રેશન પંચનામામાં પોતે કેવી રીતે રેડિયોમાં સર્કિટ સાથે વિસ્ફોટક પદાર્થ ગોઠવેલો તે પોલીસે નોંધ્યું હતું. ધરપકડના સાડા ત્રણ મહિના બાદ લવજી કોલી જામીન પર છૂટી ગયો હતો.

હત્યાના પ્રયાસ બદલ દસ વર્ષની સખ્ત કેદ સાથે વીસ હજાર રૂપિયાનો દંડ ફટકાર્યો છે. ગુનામાં મદદગારી બદલ ફીટ થયેલાં વણવીર રાઠોડને નિર્દોષ છોડી મૂક્યો છે. દંડની રકમ વસૂલ થયે પચાસ ટકા રકમ પીડિતોને ચૂકવવા હુકમ કર્યો છે. ગુનાની તપાસ અંજારના તત્કાલિન પોલીસ સબ ઈન્સ્પેક્ટર રશ્મિકાંત ગોવિંદભાઈ પરમારે કરેલી અને અંજારના સરકારી વકીલ આશિષ પી. પંડ્યાએ પેરવી કરેલી.