બનાવની ટૂંક વિગત એવી છે કે ૨૩-૧૧-૨૦૨૩ની મધરાતે સામખિયાળીના શાંતિનગરમાં ઉછીના આપેલા ૫૦ હજાર રૂપિયાની વારંવાર ઉઘરાણી કરી રહેલાં ગફૂર ઈસ્માઈલ મન્સુરીનું પડોશમાં રહેતા વિનોદ અમરશી લુહાર (રાઠોડ)એ છરી મારી મર્ડર કરી નાખ્યું હતું.

હત્યારો વિનોદ મિત્ર તૈયબ ગુલમામદ માણેકની મોટર સાયકલ વાપરતો હતો. હત્યા બાદ તે તૈયબની મોટર સાયકલ લઈને ઘરેથી નાસી ગયેલો. ત્યારબાદ અન્ય એક મિત્રને બોલાવી તેની બાઈક પર બેસીને કટારિયા રોડ પર હનુમંત ધામ પહોંચેલો. ત્યાંથી તેણે તૈયબના પુત્રને ફોન પર સંપર્ક કરીને તૈયબને મળવા બોલાવેલો.

તૈયબ કાર લઈને આવ્યા બાદ તેની કારમાં બેસીને શિકારપુર ચોકડી પાસે ગયેલો. રસ્તામાં તૈયબને પોતે વિનોદને છરી મારી હોવાનું જણાવી તેની પાસે આશરો માગેલો. તૈયબે તેને આશરો આપવા ઈન્કાર કરી શિકારપુર ચોકડી પાસે ઉતારી દીધેલો. વિનોદ ત્યાંથી પગપાળા માળિયા પાસે વિશાલા હોટેલ પાછળ રહેતા મિત્ર સલીમ સુભાન કટિયાના ઘેર ગયેલો. સલીમે પણ તેને આશરો આપવા ઈન્કાર કરતાં તે ટ્રેલરમાં બેસીને અમદાવાદ અને ત્યાંથી મુંબઈ ગયેલો. મુંબઈ ગયા બાદ તૈયબનો તેને ફોન આવેલો. તૈયબે તેને પોલીસથી બચવા ગમે ત્યાં નાસવાના બદલે પરત આવી જવા અને પોતે પોલીસ સમક્ષ હાજર કરાવી દેશે તેમ જણાવતાં વિનોદ પરત શિકારપુર આવેલો. પોલીસ તેને જોઈ જતાં ઝડપી પાડેલો.

આરોપીને સજા ફટકારતી વખતે કૉર્ટને આ બાબતની નોંધ લઈને બેઉને કારણદર્શક નોટિસ ફટકારેલી. સલીમે કોઈ જવાબ ના પાઠવતાં કૉર્ટે તેની સામે બિનજામિનપાત્ર પકડ વૉરન્ટ ઈસ્યૂ કર્યું છે. તૈયબે ખુલાસો કર્યો કે પોલીસે તો કેવળ તેનું નામ સરનામું પૂછેલું. બાકીની અન્ય હકીકતો અંગે અજાણ છે. પોતાને ફક્ત સહી કરતાં આવડે છે, લખતાં વાંચતા આવડતું નથી. પોલીસે તેને જે વિગતો કહેલી તે જ વિગતો તેણે મેજિસ્ટ્રેટને જણાવેલી. વિનોદ સાથે બનાવ બાબતે કશી વાતચીત થઈ નહોતી.

સાક્ષીઓ કોઈપણ જાતના ખચકાટ કે પસ્તાવા, ડર વગર  કૉર્ટ સમક્ષ ફરી જવાની વૃત્તિ ધરાવતાં થઈ ગયાં છે. ઘણીવાર આવા સાક્ષીઓના કારણે આરોપીઓને લાભ થતો હોય છે.

એડિ. ડિસ્ટ્રીક્ટ એન્ડ સેશન્સ જજ બી.એલ. ચૌઈથાણીએ બેઉને ભારતીય નાગરિક સુરક્ષા સંહિતાની કલમ ૩૮૩ હેઠળ દોષી ઠેરવી ત્રણ ત્રણ માસની સાદી કેદ સાથે પાંચસો પાંચસો રૂપિયા દંડ ફટકાર્યો છે.