ગત ૩ જૂનના રોજ સરફરાઝે મોરબી શહેરના ખાટકી ચોકમાં એક્ટિવા પર જઈ રહેલા યુગલ પૈકી પાછળ બેસેલી મહિલાના ગળામાંથી ચેઈન સ્નેચીંગ કરેલું. બાદમાં તે નંબર પ્લેટ વગરની બાઈક પર ફરાર થઈ ગયેલો.

ભુજમાં લોકલ ક્રાઈમ બ્રાન્ચમાં ફરજ બજાવી ગયેલા પોલીસ સબ ઈન્સ્પેક્ટર જે.વી. ઝાલા હાલ મોરબી એ ડિવિઝન પોલીસ સ્ટેશનમાં ફરજ બજાવે છે. પોલીસ અજાણ્યા ચેઈન સ્નેચરને શોધવા મથામણ કરી રહી હતી ત્યારે ઝાલાની નજર બાઈક પરથી નીકળેલાં સરફરાઝ પર પડેલી. તેને જોઈને તે તરત પામી ગયેલાં કે આ જ એ ચેઈન સ્નેચર છે.

સરફરાઝે ૨૦૧૮ અને ૨૦૧૯માં ભુજ અને માધાપરમાં ૮ ચેઈન સ્નેચીંગના ગુના આચરેલાં. તેની સામે કુલ ૧૧ ગુના નોંધાયેલાં છે. આ હિસ્ટ્રીશીટર કચ્છ પોલીસની નજરે બરાબરનો ચઢી ગયો હોઈ હવે મોરબીમાં હાથ અજમાવવા પહોંચી આવ્યો હોવાનું મોરબી પોલીસનું અનુમાન છે.