બાતમીના આધારે બોર્ડર રેન્જ આઈજીની ક્રાઈમ બોર્ડર-2ની ટીમે ગત ૧૯ જૂનની સાંજે તેની ચાય શોપ પર દરોડો પાડેલો. ચાય શોપમાંથી પોલીસે ૯ હજારની કિંમતના ૭૨ નંગ બિયર ટીન, વોડકાના ૭ ક્વાર્ટરિયા, વિવિધ નશાકારક ટેબ્લેટ્સ અને સિરપની શીશીઓનો જથ્થો જપ્ત કરેલો. અગમ્ય કારણોસર પોલીસે તેની વિરુધ્ધ કેવળ દારૂબંધીની ધારાઓ તળે ગાંધીધામ એ ડિવિઝનમાં ફરિયાદ દાખલ કરેલી.

એક વખત દરોડો પડવા છતાં હેમાંગ ઊર્ફે રામ પ્રવિણકુમાર ગોકલાણી (ઉ.વ. ૨૬, રહે. ધ વિલા સોસાયટી, શિણાય) સુધર્યો નહોતો. હેમાંગ એક્ટિવાની ડીકીમાં નશાકારક દવાઓ રાખીને તે ગ્રાહકોને છૂટક વેચાણ કરતો હોવાની બાતમીના આધારે ગત સાંજે SOGએ ડ્રગ ઈન્સ્પેક્ટરને સાથે રાખી તોલાણી કોલેજ પાછળ, મીડ ટાઉન હોટેલ પાસેથી તેને ઝડપી પાડ્યો હતો. હેમાંગના કબજામાંથી કોડેઈન કફ સિરપની ૪૨ હજારની ૩૬ શીશી અને ટ્રામાડોલ/નાઈટ્રાઝેપામની ૧૦.૯૮ લાખના મૂલ્યની ૫૩૨ નંગ ટેબ્લેટ મળી આવી હતી.

હેમાંગ ગુજરાત ફાર્મસી કાઊન્સિલમાં રજિસ્ટર્ડ ફાર્માસિસ્ટ છે. SOG પીઆઈ બી.વી. બોરીસાગરને તેણે આદિપુરની મારુતિ મેડિસીન નામની કેમિસ્ટ શોપનો ઈન્ટિમેશન લેટર બતાવ્યો હતો. જો કે, આ લેટરમાં તેનું નામ નથી.

જપ્ત થયેલી દવાઓમાં નશો કરાવે તેવા ઘટક તત્વો હોઈ પોલીસ NDPS Act તળે કાયદેસર કાર્યવાહી કરી શકે છે તેવા ડ્રગ ઈન્સ્પેક્ટર અને FSL નિષ્ણાતના અભિપ્રાયના આધારે હેમાંગ સામે આદિપુર પોલીસ મથકે NDPS Actની કલમ ૮ (c) અને ૨૨ (b) તળે સરકાર તરફે ગુનો નોંધી તેની અંગજડતીમાંથી મળેલાં ૨૧૦૦ રોકડાં રૂપિયા, ૫૦ હજારનું વાહન, મોબાઈલ ફોન વગેરે મળી ૧૧.૯૮ લાખનો મુદ્દામાલ જપ્ત કરાયો છે.