હાઈકૉર્ટના જસ્ટિસ નિર્ઝર દેસાઈએ બચાવ પક્ષના વકીલને ઉદ્દેશીને આલોચના કરતાં જણાવ્યું હતું કે કોઈ સામાન્ય માણસ બૂટલેગરની સાથે કારમાં પ્રવાસ કરતો હોય અને તેના ભૂતકાળથી અજાણ હોય તો સમજાય પરંતુ આરોપી સીઆઈડી ક્રાઈમની કોન્સ્ટેબલ છે, ત્યારે તેની પાસે અપેક્ષા રખાય કે તે જેની જોડે પ્રવાસ કરતી હોય તેના ગુનાહિત ભૂતકાળથી વાકેફ હોય જ.

આરોપીએ પોલીસના બદલે બૂટલેગરને મદદ કરતાં હોવાનું કામ કર્યું હોવાનું જણાય છે. ભૂલી જાવ કે તમે પોલીસ કર્મચારી છો, એક આમઆદમી તરીકે હો તો પણ તમારી ફરજ બૂટલેગરને ગુનો આચરતો અટકાવી પોલીસને મદદ કરવાની હોવી જોઈએ. પોલીસ પાસે શું આશા રખાય? સમગ્ર મુદ્દે સરકારી વકીલ પાસે બૂટલેગરના ગુનાની હિસ્ટ્રી, પોલીસે કઢાવેલા સીડીઆરની ડિટેઈલ્સ તથા સેશન્સ કૉર્ટે જે મુદ્દા પર જ્યુ. મેજિસ્ટ્રેટે આપેલા જામીન રદ્દ કરવા હુકમ કરેલો તે મહત્વના મુદ્દા પર સવિસ્તર નોંધ રજૂ કરવા હુકમ કરી હાઈકૉર્ટે ગુરુવારે કેસની વધુ સુનાવણી હાથ રાખી છે. આ કેસમાં એક તબક્કે કૉર્ટે બચાવ પક્ષના વકીલને નીતાની અરજી ફગાવી દઈ પાંચ લાખનો દંડ ફટકારવાની પણ ચીમકી ઉચ્ચારી હતી.