હરિયાણાના કરનાલનો ફરિયાદી પુલકિત મિત્તલ અને તેમનો પરિવાર દુલારી ફૂડ્સ નામથી રાઈસ પ્રોસેસીંગ અને એક્સપોર્ટ કંપની ચલાવે છે. જાન્યુઆરીમાં દુબઈ ખાતે આયોજીત ‘ગલ્ફ ફૂડ્સ એક્ઝિબિશન’માં તેમણે એક સ્ટોલ રાખેલો. તે સમયે તેમનો પરિચય દુબઈની ઝમ ઝમ અલભર ફીશ ટ્રેડિંગ (Zam Zam Albhar Fish Trading LLP) કંપનીના પ્રતિનિધિઓ સાથે થયેલો.

એપ્રિલમાં ઝમ ઝમ કંપનીએ ફરિયાદીની કંપની સાથે પ્રતિ ટન ૯૮૦ ડોલર લેખે ૧૫૦ ટન બાસમતી ચોખા ખરીદવાનો સોદો નક્કી કરી પરચેઝ ઓર્ડર મોકલેલો. સોદાની શરતો મુજબ એડવાન્સમાં બે હજાર ડોલરનું પેમેન્ટ જમા કરાવેલું, બાકીનું પેમેન્ટ Cash Against Documents through bank CADથી ચૂકવવાનું નક્કી થયેલું. CAD અંતર્ગત કોઈપણ પેઢી વિદેશ એક્સપોર્ટ કરેલા માલના પરઝેચ ઓર્ડર, ટ્રાન્સપોર્ટેશન, કસ્ટમ ક્લિયરન્સ વગેરેને લગતાં અસલ દસ્તાવેજો બેન્કમાં જમા કરાવે, માલ મેળવનાર પાર્ટી પેમેન્ટ ચૂક્તે કરે ત્યારબાદ જ તે પાર્ટીને આ અસલ દસ્તાવેજો મળે.

ડીલ મુજબ ફરિયાદીએ ૩૭૫૦ નંગ રાઈસ બેગ મુંદરા પોર્ટ પર મોકલી આપેલી. માલના એક્સપોર્ટ અને કસ્ટમ ક્લિયરન્સ કરાવીને ૬ કન્ટેઈનરમાં માલ દુબઈ એક્સપોર્ટ કરી આપેલો. ઝમ ઝમ કંપનીએ તેના વતી બિલ ઑફ લેન્ડીંગ ઈસ્યૂ કરવા તથા કસ્ટમ ક્લિયરન્સ વગેરે કામો માટે પીગ્લોબલ (PGlobal), ટ્રાઈમેક્સ શિપીંગ (Trimax Shipping) નામની પેઢીના અર્શદ નામના કર્મચારી તથા વિકાસ નાયર નામના ફોરવર્ડિંગ એજન્ટની નિયુક્તિ કરેલી.

એટલું જ નહીં ઝમ ઝમના પ્રતિનિધિઓએ તેમની કંપનીના બેન્ક ખાતામાં પણ કોઈ નાણાં જમા કરાવ્યાં નહોતા. ઝમઝમના પ્રતિનિધિઓ અને તેમણે નીમેલાં એજન્ટોએ માલ એક્સપોર્ટ કરી, મેળવ્યાં બાદ ડોક્યુમેન્ટેશન મુદ્દે ગોળગોળ જવાબો આપીને પેમેન્ટ ના આપતાં હોઈ ફરિયાદ નોંધાવાઈ છે.