હાઈકૉર્ટમાં કેસની સુનાવણી ચાલતી હતી તે દરમિયાન જૂન ૨૦૧૩માં તત્કાલિન નાયબ કલેક્ટરે કેટલીક જમીન ગૌચર તરીકે ફાળવવાનો શરતી હુકમ કરેલો.

જો કે, સમગ્ર કાર્યવાહી હજુ મહેસુલ તંત્રમાં પડતર છે. શુક્રવારે હાઈકૉર્ટના મુખ્ય ન્યાયમૂર્તિ સુનિતા અગ્રવાલ અને અનિરુધ્ધ માયીની ખંડપીઠે આ કેસની સુનાવણી આગળ વધારતાં કહ્યું હતું કે સરકારી તંત્ર પાસે વૈકલ્પિક રીતે ઉપલબ્ધ ગૌચર જમીન ઉપરાંત મુંદરા પોર્ટે જે ગૌચર જમીન પરત આપવા તૈયારી દાખવેલી છે તે મળીને કુલ ગૌચર વર્તમાન પશુધનની સંખ્યા સામે અપૂરતું જણાય છે. આ વિસંગતતા અંગે કચ્છ કલેક્ટર મહેસુલ વિભાગના અગ્ર સચિવ સાથે ફરજીયાત પરામર્શ કરી અંગત સ્તરે સોગંદનામું રજૂ કરે જેથી આ મામલે રાજ્ય સરકારનો ખુલાસો રેકર્ડ પર આવે કે આ સમસ્યાનો નિવેડો લાવવા કોણ પગલાં લેશે? કારણ કે, ગૌચરની ભરપાઈ કરવી એ સરકારની ફરજ છે.