કેસની વિગત એવી છે કે ભુજના બિલ્ડર ચાર્મિન વિજયભાઈ શાહે ભુજના ફારૂક આદમભાઈ ચાકી સાથે પાર્ટનરશીપમાં માંડવીના મસ્કા ખાતે ૮ એકર જમીન પર રેસિડેન્સિયલ અને કોમર્સિયલ રીયલ એસ્ટેટ પ્રોજેક્ટ શરૂ કરેલો.

અરજદાર ચાર્મિન શાહ એડવોકેટ જયદીપ કનોજીયાને ૨૪-૦૪-૨૦૨૩ના રોજ ભુજ જિલ્લા કૉર્ટમાં એપીપી સુરેશ મહેશ્વરીની ઑફિસમાં, સુરેશ મહેશ્વરીની હાજરીમાં રૂબરૂ મળેલો. તે સમયે કનોજીયાએ તેમના પ્રોજેક્ટમાં અરજીઓ કરી રોડાં નહીં નાખવા બદલ ૩૦ લાખ રૂપિયાની ખંડણી માગી હતી.

બે મહિના લાંબી તપાસ બાદ ૦૬-૦૭-૨૦૨૩ના રોજ ભુજ એ ડિવિઝન પોલીસે કનોજીયા સામે ઈપીકો કલમ ૩૮૪ અને ૧૧૧ હેઠળ ગુનો નોંધ્યો હતો.

ફરિયાદી ચાર્મિન શાહે પોતાની અરજીમાં જયદીપ કનોજીયા અને સુરેશ મહેશ્વરી બેઉને આરોપી તરીકે જોડવા રજૂઆત કરેલી પરંતુ પોલીસે તપાસમાં સંડોવણી ખૂલશે તો યોગ્ય કાર્યવાહી કરી, કૉર્ટમાં રિપોર્ટ રજૂ કરશું તેવો ઉડાઉ જવાબ આપીને મહેશ્વરી સામે યોગ્ય તપાસ કરી નહોતી. ત્યારબાદ પણ ફરિયાદીએ પોલીસને રજૂઆત કરેલી પરંતુ કેવળ જયદીપ કનોજીયા સામે ચાર્જશીટ કરીને પોલીસે સંતોષ માની લીધો હતો.

ફરિયાદીએ હાઈકૉર્ટમાં અરજી કરીને રજૂઆત કરી છે કે સુરેશ મહેશ્વરી સરકારી વકીલ હોઈ, ગુનામાં સુરેશ મહેશ્વરીનો સ્પષ્ટ રોલ અને પુરાવો હોવા છતાં પોલીસે કોઈ યોગ્ય પગલાં લીધા નથી. અરજદારે પોલીસ સમક્ષ ઑડિયો રેકોર્ડિંગની પેન ડ્રાઈવ અને જે મોબાઈલ ફોનમાં રેકોર્ડિંગ કરેલું તે મોબાઈલ ફોન પોલીસને આપેલો.

આ અરજી સામે ભુજ એ ડિવિઝન પોલીસના તપાસકર્તા પો.સ.ઈ. એચ.સી. પરમારે કૉર્ટ સમક્ષ ૧૯-૦૬-૨૦૨૫ના રોજ તૈયાર કરેલો રિપોર્ટ રજૂ કરેલો.

હાઈકૉર્ટના જસ્ટિસ હસમુખ ડી. સુથારે બંને પક્ષની રજૂઆત અને પોલીસનો રિપોર્ટ વાંચીને જણાવ્યું કે બહુ ચતુરાઈપૂર્વક રિપોર્ટ તૈયાર કરાયો છે, આ રિપોર્ટ આરોપીએ જ બનાવી આપ્યો છે કે શું? વોઈસ સ્પેક્ટોગ્રાફી ટેસ્ટનો રિપોર્ટ ક્યાં છે?

કોની સૂચનાથી આ રિપોર્ટ ડ્રાફ્ટ કરાયો છે? PC એક્ટનો ક્લિયર કટ કેસ છે. રિપોર્ટ આરોપીએ તૈયાર કર્યો છે કે શું? આ પોલીસનું ડ્રાફ્ટિંગ નથી, લિગલી બ્રેઈને તૈયાર કર્યો છે.

જસ્ટિસ સુથારે તેમના હુકમમાં પોલીસને નવેસરથી ફ્રેશ રિપોર્ટ ફાઈલ રજૂ કરવા જણાવ્યું છે. રિપોર્ટમાં અરજદારની રજૂઆત અંગે હરફ સુધ્ધાં ઉચ્ચારાયો નથી. કૉર્ટે એપીપીને પણ ફરિયાદ પક્ષે શું પગલાં લીધા છે તે મામલે એફિડેવિટ ફાઈલ કરવા હુકમ કર્યો છે.