સુરતના વેસુમાં રહેતો ૪૦ વર્ષિય વિનીત રજનીકાન્ત દેસાઈ જમીન લે-વેચનો ધંધો કરે છે. ફરિયાદી ૨૦૨૪માં શાકભાજીનો ધંધો કરતો હતો ત્યારે ભુજમાં રહેતા મસાલાના વેપારી મોઈન હુસેન ચાકી (ઉ.વ. ૨૮, રહે. ચંદન મસાલાની બાજુમાં, એકતાનગર ચોકડી, મોટા પીર રોડ, સંજોગનગર) સાથે પરિચય થયેલો. બેઉ વચ્ચે અવારનવાર ફોન પર વાતચીત થતી રહેતી.

વિનીતે મિત્રભાવે મદદ કરવાના હેતુથી  મુંબઈ રહેતાં અને આંગડિયાનું કામ કરતા પોતાના ઓળખીતા બબલુ ઊર્ફે આશિકખાનનો મોઈન સાથે ટેલિફોનિક સંપર્ક કરાવી આપેલો. ત્યારબાદ બબલુએ વિનીતને ફોન કરીને મોઈનનું આંગડિયું કરી દીધું હોવાનું કહેલું.

એક મહિના બાદ મોઈને વિનીતને ફોન કરીને સુરતમાં જેને પચાસ લાખનું આંગડિયું કરવાનું હતું તેને પેમેન્ટ ના મળ્યું હોવાનું જણાવીને બબલુનો કોન્ટેક્ટ કરવા કહેલું. વિનીતે બબલુને ફોન કરતાં તેણે પેમેન્ટ ના થયું હોવાનું કબૂલીને ટૂંક સમયમાં પેમેન્ટ કરાવી દઈશ તેવી ખાતરી આપેલી. બબલુએ પેમેન્ટ ના કરતાં પાંચમી જૂલાઈએ મોઈન સુરત આવેલો અને વિનીતને નિર્જન જગ્યાએ રૂબરૂ મળવા માટે બોલાવેલો. મોઈને પચાસ લાખનું પેમેન્ટ ના થયું હોવાનું જણાવી વિનીતને પતાવી દેવાની ધમકી આપેલી.

મોઈને ચેકમાં ૨૦ લાખની રકમ નાખીને બેન્કમાં નાખેલો જે ૧૫ જૂલાઈના રિટર્ન થયેલો. જેથી મોઈને વિનીતને ફોન કરી ધમકી આપેલી કે ‘છેલ્લી તક આપું છું, એક મહિનામાં તે પૈસા ના ચૂકવ્યાં તો સુરતમાં મારી પાસે પૈસાની રિકવરી કરવાવાળા ઘણાં બધાં છે. તેમને તારો હવાલો આપી દઈશ’

૨૩ ઑગસ્ટના રોજ મોઈન ચાકીએ સુરત આવીને વિનીતને ફોન કરી રેલવે સ્ટેશન પાસે આવેલી ચાની હોટેલ પર મળવા બોલાવેલો. વિનીત તેને મળવા ગયો ત્યારે મોઈન સાથે મુસા નામનો શખ્સ પણ હાજર હતો. પૈસા કઢાવવા માટે મુસાને હવાલો આપ્યો હોવાનું મોઈને જણાવેલું. મુસાએ પણ વિનીત જોડે ડાટી-ડફારા કરીને ગમે તે રીતે પૈસા આપી દેવા જણાવેલું. ડરી ગયેલા વિનીતે બેથી ત્રણ દિવસનો સમય માગેલો. તે સમયે બેઉ જણે વિનીત પાસે રહેલા પર્સમાંથી પાંચ હજાર રોકડાં રૂપિયા કઢાવી લીધા હતા.

૨૬ ઑગસ્ટે મોઈને ફોન કરીને વિનીતને ફરી રેલવે સ્ટેશન નજીક આવેલી ચાની હોટેલ પર મળવા બોલાવેલો. ફરી મોઈન અને મુસાએ રૂપિયા કઢાવવા ધાક-ધમકી કરેલી.

ત્યારબાદ મુસાએ આ કહેવાતા અલ્તાફ ભાઈ જોડે વિનીતની ફોન પર વાત કરાવેલી. અલ્તાફ ભાઈએ પણ ધાક ધમકી કરેલી.

મુસાએ તેને કહેલું કે ‘જો કાલ સુધી પૈસા ના આપ્યા તો મુંબઈ લઈ જઈને તારી પાસે કન્સેન્ટ લેટરમાં સહી કરાવીને એક કીડની કાઢી લઈ વેચી મારશું’ મુસાએ બળજબરીથી વિનીતના મોબાઈલમાં રહેલી બેન્ક એપમાં લોગ ઈન કરાવીને છેલ્લાં ત્રણ મહિનાના બેન્ક સ્ટેટમેન્ટ અને વિનીત જે ભાડાના ઘરમાં રહે છે તે ઘરના ભાડા કરારની નકલ મોઈનના વોટસએપ પર મેળવી હતી. એટલું જ નહીં, વિનીતના ઘરના સરનામાંની ખરાઈ કરવાના હેતુથી તેની જોડે ગાડીમાં બેસીને ઘર પાસે રૂબરૂ આવેલાં. ફરી ચાની હોટેલ પર લઈ ગયેલાં અને ત્યાં તેમણે વિનીતની કાર માગેલી. વિનીતે કાર આપવા ઈન્કાર કરેલો.

મુસાએ તેને મોઈનની બાજુમાં બળજબરીથી ઊભો રખાવીને ‘મોઈન ચાકીએ મને જમીનના વ્યવહાર પેટે આપેલા ૫૦ લાખ ચૂકવવાના બાકી છે, તેમાંથી ૨૫ લાખ આવતીકાલે બપોરે ત્રણ વાગ્યા સુધીમાં ચૂકવી આપીશ અને બાકીના રૂપિયા એક મહિના પછી આપીશ’ તેવી પરાણે કબૂલાત કરાવી તેનો વીડિયો રેકોર્ડ કર્યો હતો. ત્યારબાદ કારની ડીકીમાં રહેલી જમીનના પેપર્સને લગતી ત્રણ ફાઈલો અને વિનીતની એક્ટિવાની આરસી બૂક કબજે કરી લઈને તેને પરત જવા દીધેલો.

૨૭ ઑગસ્ટ ગુરુવારે સાંજે ચાર વાગ્યે મોઈન I-20 કારમાં મુસા તેમજ ઈમરાન નામના ત્રીજા સાગરીત સાથે વિનીતના ઘર પાસે આવીને તેને મળવા બોલાવેલો. ત્રણે જણે પૈસાની માંગણી કરીને વિનીતને બળજબરીપૂર્વક કારમાં બેસાડી અપહરણ કરવાનો પ્રયાસ કરતાં ગભરાઈ ગયેલાં વિનીતે ફોન પર પોલીસને જાણ કરેલી. નજીકમાં જ પોલીસ ચોકી હોઈ ત્યાંથી પોલીસ કર્મીઓએ સ્થળ પર દોડી આવીને વિનીતને ત્રિપુટીની ચુંગાલમાંથી છોડાવ્યો હતો.

આરોપીઓમાં મોઈન ચાકી ઉપરાંત મોહમ્મદ મસુદ ઊર્ફે મુસા મુખ્તાર ફન્ડોલે (મૂળ રહે. થાણે, મહારાષ્ટ્ર હાલ રહે. ડીંડોલી, સુરત), ઈમરાન મુસ્તાક ખાન (રહે. લિંબાયત, સુરત), બબલુ ઊર્ફે આશિકખાન અને અલ્તાફનો સમાવેશ થાય છે. વેસુ પોલીસ સ્ટેશનના પીઆઈ જિજ્ઞેશ એ. રાઠવા, પીએસઆઈ એ.કે. ચૌધરી સહિતના સ્ટાફે અન્ય આરોપીઓને પકડી પાડવા કમર કસી છે.