રાપરના અયોધ્યાપુરીમાં મહાવીર ફર્નિચરવાળી ગલીમાં રહેતી ૧૯ વર્ષની હતભાગી પલક મુકેશભાઈ સોની અમદાવાદના રાયપુરની વિવેકાનંદ કોલેજમાં બીજા વર્ષમાં ભણતી હતી. પિતા ટેક્સી ડ્રાઈવર છે. પલકનો ભાઈ દિવ્ય વિસનગર રહેતા મામા જયદિપ મોહનભાઈ સોનીના ઘેર રહી ધોરણ ૧૧માં ભણતો હતો. આજથી સવા વર્ષ અગાઉ પલકની સગાઈ નરોડાના હંસપુરા રોડ પર વ્હાઈટ એલિગેન્સ એપાર્ટમેન્ટમાં રહેતાં પાર્થ સંજયભાઈ સોની સાથે રંગેચંગે કરવામાં આવેલી. પલક અવારનવાર પરીક્ષા કે પ્રસંગ હોય ત્યારે સાસરે આવતી-જતી રહેતી.

૨૩ એપ્રિલના રોજ પલક રાપરથી બસમાં બેસીને વિસનગરમાં મામાના ઘેર ગયેલી. રાત્રે ભાવિ પતિ પાર્થ અને તેના પિતા સંજયભાઈ તેને વિસનગર આવી અમદાવાદ લઈ ગયેલાં. કોલેજમાં પરીક્ષા હોઈ પલક સાસરે રોકાયેલી. દરમિયાન, ત્રીજી મેના રોજ પલકનો ભાઈ દિવ્ય પણ બહેનના ઘેર રોકાવા ગયેલો.

દિવ્ય બહેન, ભાવિ જીજાજી અને તેના ભાઈ સાથે માણેકચોકમાં નાસ્તો કરવા લઈ ગયેલો. નાસ્તો કર્યાં બાદ ૫૯૦ રૂપિયા બિલ આવેલું.

પલકે બિલ પે કર્યાં બાદ પાર્થ પલકને ગમે તેમ બોલવા માંડેલો. ચારે જણ બે બાઈક પર ઘરે પરત જતાં હતા ત્યારે રસ્તામાં પાર્થે પલકને ‘તમે ભીખારી છો’ કહીને ગમે તેમ બોલ્યો હતો.

ઘરે આવ્યાં બાદ દિવ્યએ તેના પર્સમાંથી રૂપિયા કાઢી પાર્થને આપી દીધેલાં પણ ઝઘડો શાંત થયો નહોતો. જેથી પલકે દિવ્યને અંદરના રૂમમાં બોલાવી કપડાં પેક કરી દેવા જણાવીને ‘આપણે મામાના ઘરે જવાનું છે’ તેમ કહેતાં વધુ ભડકો થયેલો. પાર્થ અને દેવાંગે બેઉ ભાઈ બહેનને ભૂંડી ગાળો બોલીને માર મારવાનું શરૂ કરેલું. ભાવનાબેને ઘરનો દરવાજો બંધ કરી દીધેલો અને સંજયભાઈએ પડોશીઓના કાને વાત ના સંભળાય તે હેતુ ટીવીનું વોલ્યુમ વધારી દીધેલું.

રોષે ભરાઈને સંજયે પલકના વાળ ખેંચી કચકચાવીને તમાચો ઠોકી દીધો હતો. ત્યારપછી તો ચારે જણ ગાળો ભાંડવા સાથે આજે તો બેઉને પતાવી જ દઈએ કહીને બહેન-ભાઈને માર મારવા તૂટી પડ્યાં હતાં.

પાર્થના મારથી બચવા માટે પલક ભાઈની પાછળ આવીને ઊભી રહી ગયેલી. દિવ્યએ પાર્થને માર મારતો અટકાવતાં સંજયભાઈએ જોરથી લાત મારીને દિવ્યને ભોંય પર પટકી દીધો હતો.

પલકે નીચે પડતું મૂકતાં સૌ સીડીઓ ઉતરતાં હતા ત્યારે દેવાંગે દિવ્યને લાફો મારીને ‘પોલીસને કશી વાત ના કરતો નહિતર તને જાનથી મારી નાખીશ’ કહી ધમકી આપેલી. દિવ્યએ પોલીસ અને ૧૦૮ એમ્બ્યુલન્સને જાણ કરતાં પલકના મૃતદેહને સિવિલ હોસ્પિટલમાં ખસેડાયો હતો. દિવ્યએ મામા અને માવતરને જાણ કર્યાં બાદ તેઓ પરોઢે હોસ્પિટલે દોડી આવેલાં.

પલકની અંતિમવિધિ કર્યાં બાદ તેની માતા પારૂલબેન મુકેશભાઈ સોનીએ નરોડા પોલીસ મથકે પાર્થ સંજયભાઈ સોની, દેવાંગ સંજયભાઈ સોની, સંજયભાઈ લવજીભાઈ સોની અને ભાવનાબેન સંજયભાઈ સોની વિરુધ્ધ ઈપીકો કલમ ૩૦૬, ૩૨૩, ૫૦૪, ૫૦૬ (૨) ૧૧૪ હેઠળ ફરિયાદ નોંધાવી છે.