વડોદરાના પાણીગેટની ન્યૂ સનરાઈઝ સ્કુલના ધોરણ ૧થી ૫ના છાત્રો પિકનીક પર આવ્યાં હતાં. શિક્ષકો અને છાત્રો સૌ બોટીંગ કરવા બોટમાં બેઠાં ત્યારે તેમને કલ્પના સુધ્ધાં નહોતી કે મોટનાથના તળાવમાં મોત ટાંપીને બેઠું છે. કમાવાની લાલચે કોન્ટ્રાક્ટરે ૨૩ વિદ્યાર્થી અને ૪ શિક્ષકો સહિત ૩૦ જણને બોટમાં બેસાડેલાં.

ઘટનાને નજરે જોનાર લોકો બે પળ માટે આઘાતથી અવાક્ થઈ ગયાં હતાં. ત્યારબાદ ઘણાંએ બાળકોને બચાવવા માટે સીધું તળાવમાં ઝંપલાવ્યું હતું. મરણચીસો અને હો-હાના પગલે તળાવની પાળે હજારો લોકો એકઠાં થઈ ગયાં હતાં. કોઈકે ફાયર બ્રિગેડને તો કોઈકે ૧૦૮ એમ્બ્યુલન્સ સર્વિસને ફોન કરી તત્કાળ ઘટનાસ્થળે બોલાવી હતી.

પાછળથી એનડીઆરએફની ટીમ પણ જોડાઈ હતી. તળાવના તળિયે કાદવ હોઈ બચાવ અને રાહત કામગીરીમાં અડચણો સર્જાઈ હતી. દુર્ઘટનાના પગલે વડોદરા મ્યુનિસિપલ કોર્પોરેશનના સત્તાધિશો, પદાધિકારીઓ જિલ્લા કલેક્ટર, સાંસદ વગેરે ઘટનાસ્થળે દોડી ગયાં હતાં.

દુર્ઘટનાના પગલે મુખ્યમંત્રી અને ગૃહરાજ્યમંત્રી પણ વડોદરા દોડી ગયાં છે. વડાપ્રધાન અને કેન્દ્રીય ગૃહમંત્રીએ પણ ટ્વીટ કરી દુર્ઘટના અંગે દિલોસોજી પાઠવી મૃતકો અને ઈજાગ્રસ્તો માટે આર્થિક સહાયની ઘોષણા કરી છે. અયોધ્યામાં રામ મંદિરની પ્રાણ પ્રતિષ્ઠાના ભવ્ય રાજકીય કાર્યક્રમના ચાર દિવસ પૂર્વે સર્જાયેલી આ કરુણાંતિકાએ સૌને હચમચાવી દીધાં છે.