રાજકોટના ગાંધીગ્રામનો પ્રજ્ઞેશ હનુભા બારોટ નામનો યુવક નખત્રાણાની સેન્ટ ઝેવિયર્સ સ્કુલમાં છઠ્ઠી ડિસેમ્બરથી ‘ડેમો ટીચર’ તરીકે જોડાયો હતો.

ચીટર પ્રજ્ઞેશે સ્કુલમાં જોડાયાના થોડાં દિવસો બાદ છાત્રોને આંબા આંબલી બતાડવાનું શરૂ કરેલું કે અદાણી ફાઉન્ડેશન દ્વારા વડોદરામાં અંડર-14 વયજૂથના બાળકો માટે ક્રિકેટ ટુર્નામેન્ટનું આયોજન થયું છે. ૧૨ દિવસની આ ટુર્નામેન્ટમાં ભાગ લેવા માટે વિદ્યાર્થીદીઠ પાંચ હજાર રૂપિયા મારી ફી અને ૨૫ હજાર રૂપિયા એડવાન્સ પેટે આપવાના રહેશે. ટુર્નામેન્ટ પૂર્ણ થયાં બાદ વિદ્યાર્થીઓને ૨૫ હજાર રૂપિયા પરત મળી જશે.

પ્રજ્ઞેશની જાળમાં સપડાઈને ૧૨ વાલીઓએ વિવિધ રૂપિયા પેટે તેના મોબાઈલ નંબર પર ૪.૪૩ લાખ રૂપિયા ઓનલાઈન ટ્રાન્સફર કર્યાં હતા. વાલીઓના રૂપિયા એકઠાં થયા બાદ પ્રજ્ઞેશ મોબાઈલ બંધ કરીને અંડરગ્રાઉન્ડ થઈ ગયો હતો.

પ્રજ્ઞેશને તેમણે શાળામાં ‘ડેમો ટીચર’ તરીકે નોકરીએ રાખ્યો હતો. વાલીઓની અરજી પર એક-દોઢ માસની તપાસ બાદ અંતે નખત્રાણા પોલીસે પ્રજ્ઞેશ વિરુધ્ધ વિશ્વાસઘાત અને ઠગાઈનો ગુનો દાખલ કર્યો છે.

બીજું બધું તો ઠીક, પણ આ ‘ડેમો ટીચર’ની વ્યાખ્યા શું થાય તે અંગે અનેક લોકો માથું ખંજવાળી રહ્યાં છે!