દેશલપર ગુંતલી ગામે ઠા. વેલજી વિઠ્ઠલદાસ નામની જનરલ મરચન્ટ એન્ડ કમિશન પેઢી વર્ષોથી નખત્રાણા તાલુકાના વિવિધ ખેડૂતોના એરંડાની ખરીદી કરે છે. આમારા ગામના વેરશીભાઈ કેશાભાઈ આયર અને ધામાય ગામના જેશાભાઈ કાનાભાઈ આહીર અને બેઉના પરિવારજનો આ પેઢીને છેલ્લાં દસેક વર્ષથી એરંડાના પાકનું વેચાણ કરે છે.

આમ ને આમ દસ વરસ વીતી જવા છતાં વેરશીને સાડા નવ લાખ રૂપિયા જેટલું પેમેન્ટ મળ્યું નહોતું.

લાખ્ખો રૂપિયાની લહેણી બાકી નીકળતી હોઈ ખેડૂતોએ પેમેન્ટ માટે દબાણ કરવાનું શરૂ કરતાં તેમણે ગત સપ્ટેમ્બર માસમાં બેઠક યોજીને હાલ પેઢી નુકસાનીમાં ચાલતી હોવાનું જણાવીને સૌને ટુકડે ટુકડે પેમેન્ટ ચૂક્તે કરી દેવાની ખાતરી આપેલી.

વેપારી પેઢીના સંચાલકો સતત વાયદા કરતાં હોઈ કંટાળેલાં ખેડૂતોએ આજે નખત્રાણા પોલીસ મથકે હિતેશભાઈ વિઠ્ઠલદાસ બારુ, કનૈયાલાલ વિઠ્ઠલદાસ બારુ, વિરલ જમનાદાસ બારુ અને સાવન કનૈયાલાલ બારુ વિરુધ્ધ ચીટીંગની ફરિયાદ નોંધાવી છે. હિતેશની દેશલપરમાં અનાજ કરિયાણાની દુકાન છે. તો આ પેઢીની સંયુક્ત માલિકીની અન્ય બે પેઢી રમા એન્ટરપ્રાઈઝ અને રમા ટેલિકોમ એન્ડ ઈલેક્ટ્રોનિક્સ નખત્રાણાના વથાણ ચોકમાં આવેલી છે.