|
કચ્છખબરડૉટકોમ, નખત્રાણાઃ નખત્રાણાના દેવીસર ગામની નદીમાંથી રેતી કાઢીને, ઓવરલોડ માલ ભરીને જતી વખતે પકડવામાં આવેલા ફેન્સી નંબર પ્લેટવાળા ચારે આઈવા ડમ્પર અબડાસાના ધારાસભ્યના પુત્ર અર્જુનસિંહ જાડેજાના હોવાનો ઘટસ્ફોટ થયો છે. નખત્રાણા તાલુકામાં ગેરકાયદે ખનિજ ખનન અને ઓવરલોડ પરિવહન થતું હોવાની લાંબા સમયથી વ્યાપક ફરિયાદો ઉઠી રહી છે. નખત્રાણા પ્રાંત અધિકારીની સૂચનાના પગલે મામલતદાર આર.ડી. પટેલે શનિવારે દેવીસરની નદીના પટમાં તપાસ હાથ ધરી હતી. તંત્રએ GJ-12 BZ-6007, GJ-12 BX-7007, GJ-12 BZ-7007, GJ-12 CT-7007ને રોકી તપાસ હાથ ધરી હતી. ચારેય વાહનોમાં નિયત જથ્થા કરતાં ૫૧.૯૩ મેટ્રિક ટન રેતી વધુ ભરી હોવાનું સ્પષ્ટ થતાં ૨.૨૯ કરોડની કિંમતના ચારે ડમ્પર સીઝ કરીને નખત્રાણા પોલીસ સ્ટેશને રાખવામાં આવ્યા હતા. ધારાસભ્ય જાડેજાએ વાહનો પુત્રની માલિકીના હોવાનું જણાવીને તે ભાડે દોડતાં હોવાનો બચાવ કર્યો છે.
Share it on
|