એડવોકેટ નરેશ ચૌહાણે ફરિયાદમાં જણાવેલું કે ઘરમાં લાકડાના કબાટમાં તેની પત્ની, ભાભી અને દિવંગત માતાના સોના ચાંદીના ઘરેણાં રાખેલાં. ૧૮ જૂનના રોજ પત્નીએ પ્રસંગઅર્થે પિયર જવા દાગીના પહેરવા માટે કબાટ ખોલેલું ત્યારે પાંચ ઘરેણાં અને ૧૦ હજાર રોકડાં રૂપિયા મળી ૫.૬૪ લાખની માલમતા ચોરાઈ ગઈ હોવાનું બહાર આવેલું. કોઈ પરિચિત અને જાણકાર વ્યક્તિએ જ ચોરી-છૂપે ચાવી વડે કબાટ ખોલીને ચોરી કરી ફરી તાળું મારી દીધું હોવાની આશંકાના પગલે વકીલે પોતાની મેળે ચોર શોધવા પ્રયાસ કરેલો. સફળતા ના મળતા આખરે પાંચ દિવસ અગાઉ પોલીસ ફરિયાદ નોંધાવેલી.

સામખિયાળી પીઆઈ જે.એમ. ઝાલાએ ગહન તપાસ કરતાં બહાર આવેલું કે ૨૯ મેના રોજ ફરિયાદીનો સાળો ચેતન દેવજી મેરિયા (ઉ.વ. ૨૫ રહે. ચામુંડાનગર, ચોબારી, ભચાઉ) મહેમાન બનીને ઘરે આવેલો, એક રાત રોકાઈને બપોરે પરત રવાના થયેલો. બહેન કબાટના તાળાની જ્યાં ચાવી રાખતી હતી તેનાથી વાકેફ ચેતને ચોરીછૂપે ચાવી લઈ ઘરેણાં ચોરીને ચાવીને પાછી હતી તે જગ્યાએ રાખી દીધી હતી.

ત્યારપછીના દિવસોમાં સાડા ત્રણ તોલા સોનાનો હાર ચેતને તેના મિત્ર સચિન વેલાભાઈ વરચંદને વેચવા માટે આપીને બે લાખ રૂપિયા મેળવ્યાં હતા. પોલીસે જણાવ્યું કે ઘરેણાંના વેચાણથી ઉપજેલાં રૂપિયેથી ચેતને નવું બાઈક, એર કન્ડિશન ખરીદેલાં, તેની કરિયાણા અને બાળકોના પડીકાની દુકાનમાં નવો માલ ભરાવેલો. પોલીસે ચેતન સાથે તેના મિત્ર સચિનની પણ ધરપકડ કરી છે.