SMCના પીઆઈ એસ.એમ. જાડેજા અને તેમની ટુકડીએ ગત રાત્રે મુંદરાના નાના કપાયા પાસે અદાણી બાયપાસ પાસે એક ટ્રાન્સપોર્ટ પેઢીની ઑફિસમાં ધસી જઈને ત્યાં બેઠેલાં રમેશ રામભાઈ ગઢવી (ઉ.વ. ૨૧, રહે. સદગુરુ સ્માર્ટ વિલા પાસે, ઉમિયાનગર, મુંદરા) અને તેના મિત્ર કિશન હરજીભાઈ સાલાણી (કોળી) (ઉ.વ. ૨૬, રહે. સરકારી કુમાર છાત્રાલય, પોર્ટ કોલોની પાસે, મુંદરા)ને દબોચી લીધા હતા. પોલીસે ઑફિસમાં પડેલા લાકડાના ટેબલનું લોક મારેલું ખાનું ખોલાવી તલાશી લેતા તેમાં એક ખાખી બોક્સમાં રાખેલા દેશી બનાવટના ૯ એમએમના બે તમંચા મળી આવ્યા હતા.

પોલીસે બંનેની પૂછપરછ કરતાં બહાર આવ્યું કે રમેશ ગઢવી તેના પિતાના ટ્રાન્સપોર્ટ વ્યવસાય સાથે કાયદા શાખામાં અભ્યાસ કરે છે. કિશનનો પરિવાર મુંદરામાં આઈસ્ક્રીમની દુકાન ચલાવે છે. બેઉ બાળપણના મિત્ર છે. રમેશના પિતા અગાઉ ભોજનાલય ચલાવતા હતા ત્યારે ત્યાં મુંદરા પોર્ટમાં માલ સામાન ભરવા અને ખાલી કરવા આવતાં જતા અનેક ટ્રક ચાલકો ભોજન કરતા હતા. ભોજનાલયમાં અવારનવાર જમવા આવતા રાજસ્થાન બાડમેરના ધનરાજ હનુમાનરામ ચૌધરી જોડે રમેશને મિત્રતા થઈ ગયેલી.

રમેશ અને કિશન પિસ્તોલો વેચીને કમાણી કરવા ઈચ્છતા હતા. રમેશે ધનરાજને આ અંગે વાત કરતા ધનરાજે તેને પિસ્તોલની વ્યવસ્થા કરી આપવાની ખાતરી આપેલી. આજથી સવા બે વર્ષ અગાઉ ધનરાજ બે દેશી પિસ્તોલ લઈને ગાંધીધામ વરસાણા પાસે આવેલો.

પિસ્તોલ લાવીને રમેશે તેની ઑફિસના કબાટમાં સાચવીને મૂકી દીધી હતી. જો કે, છએક માસ બાદ કિશને રમેશ પાસેથી તમંચા લઈને ફોટા પાડી ઈન્સ્ટાગ્રામ પર પોસ્ટ કર્યાં હતા.

તમંચો વેચનાર ધનરાજ સહિત ત્રણે સામે SMC પોલીસ મથકે આર્મ્સ એક્ટની ધારાઓ તળે ગુનો નોંધાયો છે. પોલીસે રમેશના કબજામાંથી એક લાખની કિંમતના બે ફોન, બે લાખના મૂલ્યના બેઉ દેશી તમંચા, ૧૪ કારતૂસ વગેરે મુદ્દામાલ કબજે કર્યો છે.