કમ્મરતોડ ટેરિફના ઓછાયા વચ્ચે આજે મુંદરાના સમાઘોઘા ખાતે કાર્યરત જિન્દાલ સૉ લિમિટેડે વર્ષોથી કામ કરતાં ૬૦૦ જેટલા કર્મચારીઓને રાતોરાત છૂટ્ટાં કરી દેતાં દેકારો મચી ગયો છે.

આ બાબતથી અજાણ અનેક શ્રમિકો સવારે નિત્યક્રમ મુજબ ફેક્ટરી પર પહોંચ્યા ત્યારે પંચિંગ મશિનમાં તેમના નામ લૉક થઈ ગયાં હતા અને તેઓ અંદર પ્રવેશી શક્યા નહોતા. રાતોરાત નોકરી પરથી દૂર કરી દેવાયેલાં શ્રમિકોનું મોટું ટોળું ગેટ પર એકઠું થઈ ગયું હતું અને આ રીતે એકાએક નોકરીમાંથી દૂર કરી દેવા સામે વિરોધ વ્યક્ત કર્યો હતો.

આ રીતે રાતોરાત દૂર કરી દેવા અનુચિત છે.  

છૂટાં કરાયેલાં એક પરપ્રાંતીય શ્રમિકે રડતાં રડતાં માધ્યમો સમક્ષ વ્યથા ઠાલવતાં જણાવ્યું હતું કે વર્ષોથી મારું વતન છોડીને અહીં સ્થાયી થયો છું. ભાઈ-બહેનોને ભૂલી ગયો છું, મારું ગામ ભૂલાઈ ગયું છે.

લાખો રૂપિયાના પગાર લેતા કર્મચારીઓને કાઢ્યા નથી અને અમારા જેવા પંદર હજાર રૂપિયાના પગારદારોને દૂર કરી દેવાયાં છે. અન્ય એક સ્થાનિક યુવકે કચ્છીમાં જણાવ્યું કે આઠ વરસથી કંપનીમાં કામ કરું છું. આજે અચાનક કહી દેવાયું કે નોકરી બંધ. હવે ઘરમાં લોકોને ખવડાવીશ કેમ? છોકરાઓના ભણતરનું શું થશે? સ્થાનિક ચૂંટાયેલા આગેવાનો પણ ફેક્ટરી ખાતે દોડી આવ્યા હતા અને શ્રમિકોની વેદના સાંભળીને કંપની સંચાલકો સમક્ષ રજૂઆત કરી હતી. કામદારોને રાતોરાત છૂટ્ટાં કરી દેવા મુદ્દે કંપનીએ કશી સત્તાવાર પ્રતિક્રિયા આપી નથી.