૬ એપ્રિલે ચોરી અંગે ફરિયાદ નોંધાયા બાદ મુંદરા પોલીસે સઘન તપાસ કરીને ફારુક હાસમ ચબા, મુબારક અલી ચબા, અબ્બાસ આદમ ભટ્ટી (મૂળ રહે. ત્રણેય તુણા વંડી, અંજાર) અને ગફુર હુસેન વાઘેર (રહે. નવીનાળ)ની ધરપકડ કરી છે. તેમના કબજામાંથી પોલીસે ૧ લાખની કિંમતના ૧૦૦ કિલોગ્રામ કોપર કેબલનો જથ્થો રીકવર કર્યો છે.

પોલીસે પકડેલાં ચાર પૈકીના ત્રણ જણાં કુતળી બંદરે માછીમારીની આડમાં ફરતાં હોવાનું ખૂલ્યું છે. જે કંપનીમાં ચોરી થયેલી તે ટુંડા વાંઢની સીમમાં આવેલી છે. ટુંડા વાંઢના સ્થાનિક રહેવાસીઓએ અગાઉ અનેક વખત વહીવટી તંત્ર, મત્સ્યોદ્યોગ કચેરી અને પોલીસ પ્રશાસનને લેખીત મૌખિક રજૂઆતો કરેલી છે કે કુતળી બંદરનો અંજારના તુણા, વંડી, સંઘડ, રામપરના માછીમારો ગેરકાયદે માછીમારી માટે દુરુપયોગ કરી રહ્યાં છે. તેમના ગામોમાં મત્સ્ય ઉતરાણ કેન્દ્રો આવેલા હોવા છતાં તેઓ કુતળી બંદરે માછલીઓની સૂકવણી કરે છે, બોટો રાખે છે. હકીકતમાં કુતળી બંદરને મત્સ્ય ઉતરાણ કેન્દ્ર તરીકે જાહેર જ કરાયું નથી.

આ લોકોએ કુતળી બંદરે અનધિકૃત દબાણો કર્યાં છે. માછલીઓની સૂકવણી અને તેના પરિવહન કારણે ગામમાં ભારે દુર્ગંધ ફેલાય છે. અનેક માછીમારો નશીલા પદાર્થોનું સેવન કરતાં હોઈ અશાંતિ સર્જાય છે. ટોકન વગર ગેરકાયદે માછીમારી કરતાં ઝડપાય છે.

૨૦૨૪માં ભુજસ્થિત મદદનીશ મત્સ્યોદ્યોગ નિયામકે પશ્ચિમ કચ્છ એસપી અને કલેક્ટરને પણ આ અંગે લેખીત પત્ર પાઠવી કાયદો વ્યવસ્થા જાળવવા યોગ્ય પગલાં લેવા જાણ કરી હતી. ટુંડાના ગ્રામજનોની વારંવાર રજૂઆત છતાં કોઈ પગલાં ના લેવાતાં સરકાર દ્વારા કરાતી કોસ્ટલ સિક્યોરીટીની વાતો કેવળ બણગાં હોવાનું પૂરવાર થઈ રહ્યું છે.