મંદિર ટ્રસ્ટ દ્વારા ખરીદાયેલી જમીનોમાં પણ કરોડોનો ગફલો થયો હોવાના, ભક્તોએ રામ મંદિર નિર્માણ માટે આપેલી ચાંદીની ઈંટો સહિતના મૂલ્યવાન આભૂષણો પણ બારોબાર હજમ થઈ ગયાં હોવાના પુરાવા સહિતના દાવા અને આરોપ થઈ રહ્યાં છે. હિંદુત્વના નામે મત માંગતી ભાજપની રાજ્ય અને કેન્દ્ર સરકાર તથા રજિસ્ટ્રેશન વગરની કહેવાતી એનજીઓ આર.એસ. એસ. આ મુદ્દે બૅકફૂટ પર છે. આ મામલે કોંગ્રેસ અને સમાજવાદી પાર્ટી સહિતના વિરોધ પક્ષોએ સંસદ પરિસરમાં તાજેતરમાં એક પ્રહસન યોજીને દેશવાસીઓને ચંદા ચોરી મામલે અવગત કરાવવા પ્રયાસ કરેલો.

પપ્પુ યાદવે ભગવો પહેરીને કરેલાં પ્રહસનથી હિંદુઓ અને સનાતનીઓની લાગણી દુભાઈ હોવાની કચ્છના સાધુ સંતોએ તંત્રને રજૂઆત કરતાં કચ્છ કોંગ્રેસ ભડકી છે.

‘મહામાનવ’ એવા દેશના વડા પ્રધાન બાળ રામને પોતાની આંગળી પકડીને ચાલતાં જઈ પોતાને મોટા બતાડતાં હતા ત્યારે કેમ કોઈની લાગણી દુભાઈ નહોતી? ભારતના કતલખાનાઓના માલિકો પાસેથી ભાજપ ચૂંટણી ફંડ લે છે અને ભાજપના અંધભક્તો નરેન્દ્ર મોદીને અવારનવાર ભગવાનના રૂપમાં બતાવે છે ત્યારે કોઈ સનાતન સમાજની લાગણી દુભાતી નથી.

માત્ર ભાજપ સરકારને જ સમર્થન મળે તે જ હેતુથી સાધુ સંતોની આવી સભાઓ કે કાર્યક્રમો યોજાય છે. ભાજપ સરકારે દેશના શંકરાચાર્યનું પણ વારંવાર અપમાન કરેલું છે. ત્યારે કોઈ સનાતનીની લાગણી દુભાઈ નહોતી. પણ ભાજપ સરકાર સામે કોઈ વિરોધ કરે ત્યારે જ કચ્છના સાધુ સંતોનો વિરોધ થાય છે.