હતભાગી ઓમચંદ્ર વોટર પ્લાન્ટમાં અઠવાડિયાથી નોકરીએ લાગ્યો હતો અને પ્લાન્ટ પાસે આવેલી ઓરડીમાં તેના કૌટુંબિક મામાના દીકરા બલેશ્વર બેસરા સાથે રહેતો હતો.

બલેશ્વરે પોલીસને આપેલી ફરિયાદમાં જણાવ્યું હતું કે તે છ માસથી વોટર પ્લાન્ટમાં નોકરી કરે છે અને તે જ ઓમને થોડાંક દિવસો અગાઉ અહીં નોકરી માટે લઈ આવેલો. બુધવારે રાત્રે અદાણી વિલ્માર રિફાઈનરી નજીક આવેલી કોલોનીમાં તેમના વતનના રહેતા લોકોના નૃત્યનો કાર્યક્રમ યોજાયો હતો. જેને જોવા માટે ફરિયાદી બલેશ્વર, ઓમ તથા પાણીના પ્લાન્ટમાં કામ કરતા રૂપેશ માંઝી, રાજેન્દ્ર ઊર્ફે પાંડે માંઝી, સુદામા, રોમેન ટંટી બધા ત્યાં ગયા હતા.

રાત્રે સવા બે વાગ્યે ફરિયાદી અને તેનો મિત્ર રૂપેશ રૂમ પર પહોંચ્યા ત્યારે ત્યાં ઓમ કે અન્ય કોઈ સાથીદારો જોવા મળ્યાં નહોતા.

સવારે પાણીની ફેરી કરીને પરત આવતા નાળા પાસે ઓમની લાશ પડી હોવાની જાણ થઈ હતી. બલેશ્વરની ફરિયાદના આધારે પોલીસને ઓમ સાથે રહેતા ચાર સહકર્મીઓ પર શંકા ગયેલી.

ગુનાનો ભેદ ઉકેલવા મુંદરા પીઆઈ આર.જે. ઠુંમરના નેતૃતવમાં બે પોલીસ સબ ઈન્સ્પેક્ટર અને ૧૮ પોલીસ કર્મચારીઓની ત્રણ ત્રણ ટીમ બનાવાઈ હતી.

પોલીસે રોમેનને ઉપાડીને પૂછપરછ કરતા તેણે ગુનો કબૂલી લીધો છે.

આરોપીએ પોલીસને જણાવ્યું કે બુધવારે સવારે ગાડી ચલાવવા મુદ્દે તેને ઓમ જોડે માથાકૂટ થયેલી. તેની અદાવત રાખીને રાત્રે કાર્યક્રમ જોઈ પરત ફરતા હતા ત્યારે ઓમને વાતો વાતોમાં પાણીના નાળા પાસે લઈ આવી નીચે પડેલો સિમેન્ટનો બ્લોક ઉપાડીને તેના માથામાં ફટકારી દીધો હતો. હત્યા બાદ ઓમ પાસે રહેલા બે મોબાઈલ ફોન અને સિમેન્ટનો ગજીયો નજીકની ગટર ટેન્કમાં ફેંકી દીધા હતા. પોલીસે આરોપીને ઘટનાસ્થળે લઈ જઈ બનાવનું રીકન્સ્ટ્રક્શન કરીને ગજીયો અને બંને ફોન રીકવર કરી લીધા છે.