આ યુવક છેલ્લાં ઘણાં મહિનાથી વારંવાર ઊંડા શ્વાસ ભરીને પેટ્રોલની વાસ લેતો હતો. શરૂઆતમાં ઉત્સુકતા અને મિત્રોના પ્રભાવથી આ ટેવ પડી હતી, સમય જતાં યુવકને તેનું વ્યસન થઈ ગયેલું.

મનોચિકિત્સક ડૉ. રિધ્ધિબેન ઠક્કરે જણાવ્યું કે દર્દી સારવાર માટે આવ્યો ત્યારે ચક્કર આવવા, ધ્યાનમાં ઘટાડો, ચીડીયાપણું, ઊંઘમાં ગડબડ અને પરિવાર સાથે મતભેદ જેવી સમસ્યાઓ હતી. પેટ્રોલનો નશો કરવાના લીધે તેને આ બધી સમસ્યાઓ સર્જાઈ હતી. પરિવારજનો સમજદારી દાખવી તેને મનોચિકિત્સકો પાસે લઈ આવ્યા હતા. તબીબોએ યુવકનું યોગ્ય કાઉન્સેલિંગ કર્યું. દવાઓ અને પરિવારના સહકારથી યુવક આ વ્યસનથી મુક્ત થઈ ગયો.

જી.કે.માં દર્દીના વ્યસન, નિદાન અને તેનું  મૂલ્યાંકન કરી જરૂરિયાત મુજબ કાઉન્સેલિંગ, મનોચિકિત્સા અને દવાઓ દ્વારા સારવાર આપવાની સાથે પરિવારને પણ માર્ગદર્શન આપવામાં આવે છે.

મનોવિજ્ઞાનમાં આવા પ્રકારના વ્યસનને ઈન્હેલેન્ટ યુઝ ડીસઓર્ડર તરીકે ઓળખવામાં આવે છે. આવા દર્દીઓ પેટ્રોલ, થીનર કે સોલવન્ટ જેવા પેટ્રોલિયમ પદાર્થોને સૂંઘીને નશો મેળવે છે. ઘણાં લોકો આ જ રીતે વ્હાઈટનરનો પણ નશો કરે છે. કેટલાંક આયોડેક્સ સૂંઘીને કે તેને બ્રેડ પર બટરની જેમ લગાવીને આરોગીને નશો કરે છે. થોડાંક સમય અગાઉ પશ્ચિમ બંગાળના દુર્ગાપુરમાં એક ગંભીર કિસ્સો બહાર આવેલો. કેટલાંક યુવકો કોન્ડોમને પાણીમાં ઉકાળીને તેનો નાસ લઈ નશો કરતાં હતા.

મનોચિકિત્સકો ડૉ. ખુશી ગણાત્રા અને ડૉ. યેશા કલ્યાણીએ કહ્યું કે ચક્કર આવવા, માથું ભારે લાગવું, ધ્યાન અને સ્મૃતિમાં ઘટાડો, અસ્પષ્ટ બોલવું,  આંખો લાલ થવી અને નાક અથવા કપડાંમાંથી કેમિકલની ગંધ આવવી તેના લક્ષણો  હોય છે.

આ પ્રકારનું વ્યસન છૂપાવવા કરતાં સમયસર સારવાર લેવી અત્યંત જરૂરી છે.