લોકોની અવરજવર અને ટ્રાફિકથી સતત ધમધમતાં રહેતા બારોઈ રોડ પર અંદાજે બપોરે બે વાગ્યે આ ચકચારી ઘટના ઘટી હતી. દુકાનદાર રાજેન્દ્ર પાટણીયા અને તેમનો પુત્ર વિશાલ બેઉ દુકાનમાં હાજર હતા. રાજેન્દ્રભાઈ સોફા પર બેસેલાં અને વિશાલ થડા પર ઊભો હતો ત્યારે અચાનક ચાર બુકાનીધારી યુવકો અંદર પ્રવેશ્યાં હતા.

એક જણો થેલો કાઢીને શૉ કેસમાં રાખેલાં દર-દાગીના તેમાં ભરવા માંડ્યો હતો. અન્ય એક જણો દુકાનની અંદર દરવાજે ઊભો હતો.

ચારે જણ લૂંટ ચલાવીને દુકાન બહાર જવાનો પ્રયાસ કરતા હતા તે સમયે રાજેન્દ્રભાઈએ થેલો લઈને નાસી રહેલા લૂંટારાને પકડી લઈ બૂમાબૂમ કરવાનું શરૂ કરી દીધું હતું. અચાનક થયેલાં પ્રતિકારથી ડરી જઈને અન્ય એક લૂંટારાએ ફાયરીંગ કરતાં આસપાસના દુકાનદારો અને લોકો દુકાને દોડી આવ્યાં હતા. પિતા પુત્રએ પકડેલા લૂંટારાએ છૂટવા માટે ઝપાઝપી કરેલી તે દરમિયાન તૂટેલો કાચ વાગી જતાં લૂંટારો ઘવાઈને સ્થળ પર ઢળી પડ્યો હતો. પબ્લિકને જોઈને અન્ય ત્રણે જણ બે બાઈક પર નાસી છૂટ્યાં હતા.

મુંદરાના પોલીસ ઈન્સ્પેક્ટર એસ.એમ. રાણાએ જણાવ્યું કે પ્રાથમિક તબક્કે લૂંટારાઓએ હવામાં એક રાઉન્ડ ફાયર કર્યો હોવાનું જણાઈ આવ્યું છે. દુકાનમાંથી લૂંટેલા ઘરેણાં ભરેલો થેલો બચી ગયો છે પરંતુ એક જણે કેટલાંક દર-દાગીના તેના ખિસ્સામાં નાખ્યાં હોય તેવી શક્યતા છે. દુકાનનો સ્ટોક વેરીફાઈ કર્યાં બાદ દુકાનદાર તે બાબત સ્પષ્ટ કરશે. ઝડપાયેલો શખ્સ મૂળ મધ્યપ્રદેશનો વતની છે. ઘટના બાદ ત્રણે બાઈકસવારો ગુંદાલા તરફ નાઠાં હોવાનું સીસીટીવી પરથી સ્પષ્ટ થયું છે. ત્રણેને દબોચી લેવા ચોતરફી પ્રયાસો ચાલી રહ્યાં છે.

ચારે જણે ખૂબ આયોજનપૂર્વક લૂંટનું આયોજન કર્યું હોવાનું જણાઈ આવે છે. પોલીસની વિવિધ ટીમો કામે લાગેલી છે અને નાસી છૂટેલાં ત્રણે જણને કચ્છ બહાર ભાગે તે પહેલાં ઝડપી પાડવા પોલીસ કૃતનિશ્ચયી જણાય છે.