બાતમીના આધારે ફ્લાઈંગ સ્ક્વોડ રાતે બે વાગ્યે કોઠારા પોલીસની ટીમને સાથે રાખીને નુંધાતડ પહોંચી હતી. ખનિજ ચોરોએ ગામમાં જતા તમામ નાકા પર બાતમીદારો તૈનાત કર્યાં હતા. જેવું કોઈ ખાનગી વાહન ગામમાં પ્રવેશ કરે કે બાતમીદારો ગામના સીમાડે રહેલા ખનિજ ચોરોને એલર્ટ કરી દેતાં.

ફ્લાઈંગ સ્ક્વૉડના મદદનીશ નિયામક મેહુલ શાહે જણાવ્યું કે સ્થળ પર મશિનની ચેઈનના નિશાન જોવા મળ્યાં હતા. રાતના અંધારામાં આ નિશાનના આધારે ફ્લાઈંગ સ્ક્વૉડ એક્સકેવેટર ખાનગી માલિકીના સર્વે નંબર ૮૯માં પાર્ક કરાયેલા વોલ્વો કંપનીના એક્સકેવેટર સુધી પહોંચી ગઈ હતી.

સરકારી ટીમ આ મશિન જપ્ત ના કરે તે માટે ખનિજ ચોરોએ યેનકેન પ્રકારે દબાણ ઊભું કરવા પ્રયાસ કર્યાં હતા. પરંતુ, તેમની કોઈ કારી ફાવી નહોતી. આ એક્સકેવેટર મશિનનો માલિક નુંધાતડનો સદ્દામ હુસેન પઢિયાર હોવાનું બહાર આવ્યું છે. મશિન લૉક કરાયેલું હોઈ ફ્લાઈંગ સ્ક્વૉડે સવારે ભુજથી ખાનગી મિકેનિકને સ્થળ પર બોલાવી, તેને અનલૉક કરાવીને કોઠારા પોલીસ મથકે લઈ જઈ પોલીસને તેની કસ્ટડી સોંપી છે.

જે સ્થળે ખનિજ ચોરી કરાઈ છે તે મોટા ખાડાની માપણી કરવામાં આવી છે. તેના આધારે કેટલાં પ્રમાણમાં અને કેટલાં મૂલ્યનું બેન્ટોઈનાઈટ ગેરકાયદે ખોદી કઢાયું છે તેનો એક-બે દિવસમાં ક્યાસ કાઢી ખનિજ ચોરો સામે કાયદેસર દંડનીય કાર્યવાહી હાથ ધરવામાં આવશે. ઉલ્લેખનીય છે કે ભૂતકાળમાં દેશવિરોધી પ્રવૃત્તિઓમાં સામેલ અબડાસાનો એક માઈનીંગ માફિયા વર્ષોથી ખનિજ ચોરી કરીને સામાજિક રાજકીય આગેવાન બની બેઠો છે.

પોતાને રોબિનહુડ ગણતા આ માફિયા પર અનેક ગંભીર ગુનાઓ હોવા છતાં રાજકીય સંરક્ષણના કારણે ખુલ્લેઆમ ફરીને બેફામ ખનિજ ચોરી કરી રહ્યો છે. આવા માફિયાઓ ઉપરાંત કોમન મેન હોવાનો ડોળ કરીને ફરતાં રાજકીય નેતાઓ પણ રાત દિવસ બેફામ ખનિજ ચોરી કરી રહ્યાં છે.