ગઈકાલે સવારે સરાજાહેર થયેલા હુમલાની વીડિયો ક્લિપ ભારે વાયરલ થયેલી. દસેક દિવસ અગાઉ માંડવી પોલીસ અને મામલતદારે સંયુક્ત કાર્યવાહી હાથ ધરીને શિરવા ગામે કાદરશા લતીફશા સૈયદ અને તેના જમાઈ અકબરશા દાવલશા સૈયદના ગેરકાયદે મકાનો જમીનદોસ્ત કર્યાં હતા.

ગઈકાલે મંગળવારે સવારે પોણા નવના અરસામાં રીઝવાન ગઢશીશા ત્રણ રસ્તા પાસે ચાની હોટેલ પર મિત્ર સોયેબ ચૌહાણ અને સંબંધી ગફુરભાઈ જોડે વાતો કરતો હતો. તે સમયે કાદરશાના બે પુત્રો હકીમશા અને જમીલશા, કાદરશાના જમાઈ અકબરશા અને તેના ભાઈ નુરઅલીશા સૈયદે બે બાઈક અને મોપેડ પર ધોકા-પાઈપ સાથે ધસી જઈને હુમલો કર્યો હતો.

‘અમારા મકાનોના ડિમોલીશનમાં તે બહુ રસ લીધો હતો અને ડિમોલીશન સમયે તું પંચ તરીકે હાજર રહેલો, તારી જુબાની ફેરવી નાખજે, આજે તો પતાવી જ દેવો છે’ કહીને હુમલો કરેલો. હુમલા સમયે નજીકમાં ઉભેલા સોયેબ ચૌહાણને ખભા પર પાઈપ વાગી હતી.

હુમલામાં રીઝવાનને ઠેર ઠેર મુઢ માર સાથે આંગળીમાં ફ્રેક્ચર થઈ ગયું છે. હુમલાના આગલા દિવસની સવારે કાદરશાએ પણ રીઝવાનને રસ્તામાં રૂબરૂ મળીને ‘તું અમારી નજરમાં જ છે, ધ્યાન રાખજે. મારા છોકરાઓને કહ્યું છે કે રીઝવાન જ્યાં દેખાય ત્યાં તેના ટાંટિયા ભાંગી નાખજો’ કહીને ધમકી આપેલી.

પોલીસે કાદરશા સહિતના તમામ પાંચે આરોપીઓ સામે પૂર્વ આયોજીત કાવતરું ઘડીને, જીવલેણ હુમલો કરી હત્યાનો પ્રયાસ કરવા સહિતની કલમો તળે ગુનો દાખલ કર્યો છે. ઘટનાને ગંભીરતાથી લઈ લોકલ ક્રાઈમ બ્રાન્ચે ગત મોડી રાતે ડુમરા વાડી વિસ્તારમાં છૂપાયેલાં જમીલશા, હકીમશા અને નુરઅલીશા ઊર્ફે દાદાની ધરપકડ કરી લીધી હતી.