બનાવ ગત રાત્રે સાડા નવના અરસામાં બન્યો હતો. મુંદરાની જૂની પોસ્ટ ઑફિસ ડેલીમાં રહેતા મુંદરાના પૂર્વ સરપંચ અને શૈક્ષણિક ટ્રસ્ટના પ્રમુખ એડવોકેટ ધર્મેન્દ્ર જેસરના ઘેર નરેન્દ્ર તેના સાગરીત સાથે આવ્યો હતો. સાગરીતના હાથમાં લોખંડની પાઈપ હતી. નરેન્દ્રએ ડૉર બેલ વગાડતાં ધર્મેન્દ્રભાઈના પત્નીએ દરવાજો ખોલેલો.

બનાવ અંગે જેસરે અજાણ્યા સાગરીત સાથે ગેરકાયદે ગૃહ અપપ્રવેશ કરીને ભૂંડી ગાળો ભાંડી પોતાના તથા પત્ની સાથે મારપીટ કરી પત્નીને ધક્કો મારી નીચે પાડી દઈ જાનથી મારી નાખવાની ધમકી આપી ગુનો આચર્યો હોવાની મુંદરા પોલીસ મથકે ફરિયાદ નોંધાવી છે. હુમલાનો બનાવ સીસીટીવીમાં કેપ્ચર થઈ ગયો છે અને વીડિયો ફૂટેજ વાયરલ થઈ રહ્યાં છે.

સૂત્રોના જણાવ્યા મુજબ આરોપી મોબાઈલ બંધ કરીને અંડરગ્રાઉન્ડ થઈ ગયો છે. આરોપી નરેન્દ્ર કોંગ્રેસમાંથી ભાજપમાં આવેલાં અને મુંદરાના પૂર્વ પાલિકા પ્રમુખ રહેલા કિશોરસિંહ પરમારનો કૌટુંબિક ભત્રીજો છે. નરેન્દ્ર હાલ મુંદરા શહેર ભાજપમાં ઉપ પ્રમુખપદે પાર્ટીની સેવા કરી રહ્યો છે. ઘટના પાછળ જે કોઈ અંટશ કે અદાવત હોય પણ કાયદો હાથમાં લેતી આવી લુખ્ખાગીરી હરગીઝ સાંખી ના શકાય. ભાજપના જ સિનિયર નેતા પર હુમલાની ઘટનાના પગલે ભાજપની આબરૂની ચીરહરણ થઈ રહ્યું છે પરંતુ પાર્ટીએ હજુ સુધી નરેન્દ્ર વિરુધ્ધ કોઈ એક્શન નથી લીધાં!