બનાવને ૨૪ કલાકથી વધુનો સમય વીતી ગયો છે પરંતુ અન્ય ત્રણે લૂંટારા બાઈક લઈને ક્યાં નાસી ગયાં? ઉપર આભમાં અલોપ થઈ ગયાં કે નીચે ધરતીમાં સમાઈ ગયાં? તે બાબત અંગે પોલીસ કશો જ ફોડ પાડતી નથી.

મુંદરા વિભાગના મદદનીશ એસપી ગૌતમ વિવેકાનંદને જણાવ્યું કે ‘વિવિધ એંગલ પર અમારી જુદી જુદી ટીમ, એલસીબી અને એસઓજીની ટીમો ગહન તપાસ કરી રહી છે. ગુનાનો ભેદ ઉકેલવા માટે પોલીસ કૃતનિશ્ચયી છે’ ઘટનાના પગલે આજે પશ્ચિમ કચ્છ એસપી મુંદરા દોડી ગયાં હતા.

પંકજની સઘન પૂછપરછ ચાલી રહી છે પરંતુ અન્ય આરોપીઓને સાંકળતી કોઈ મહત્વપૂર્ણ કડીઓ મળી છે કે કેમ તે અંગે પોલીસ ‘તપાસના હિત’માં કશો ફોડ પાડતી નથી. આ બનાવે પશ્ચિમ કચ્છ પોલીસની આબરૂ દાવ પર લગાડી દીધી છે. ઉલ્લેખનીય છે કે ભૂતકાળમાં પૂર્વ કચ્છમાં થયેલાં આવા ચકચારી બનાવોમાં મોટાભાગે સ્થાનિકે રહેતા પરપ્રાંતીય માણસો દ્વારા અન્ય રાજ્યોની ગેંગના માણસોને ટીપ અપાઈ હોવાના દાખલા બહાર આવેલાં છે.

ગુનામાં વપરાયેલું બાઈક ભુજના માધાપરમાંથી ચોરાયું હોવાનું બહાર આવ્યું છે. નાસી છૂટેલાં આરોપીઓની શોધખોળ વચ્ચે આજે ફોરેન્સિક લેબ અને ડૉગ સ્ક્વૉડની મદદથી જરૂરી પુરાવાઓ એકત્ર કરવા ઘટનાસ્થળે કવાયત હાથ ધરાઈ હતી.