રશીદાબેને ફરિયાદમાં જણાવ્યું કે સાંજે ૬ વાગ્યે તેમના ઘરે ત્રણ અજાણ્યા માણસો આવેલાં અને ‘ઈમ્તિયાઝ ક્યાં છે?’ તેમ પૂછતાં રશીદાબેને ‘તે હોટલે હશે’ તેમ જણાવતાં તેઓ જતાં રહેલાં. ઈમ્તિયાઝ ના મળતાં થોડીકવાર પછી ફરી આ ત્રિપુટી ઘરે આવેલી અને ફળિયામાં બેઠેલી.

ત્રિપુટીએ રશીદાબેનને ઈમ્તિયાઝને ફોન લગાડી વાત કરાવવા જણાવતાં રશીદાબેને પુત્રને ફોન જોડેલો. ઈમ્તિયાઝે ફોન ઉપાડતાં માતાએ તેની જોડે નાણાંની ઉઘરાણી મુદ્દે પ્રાથમિક વાતચીત કરીને એક શખ્સને ફોન આપેલો. આ શખ્સે ઈમ્તિયાઝને ‘શ્યામ ગઢવી આદિપુરવાળો બોલું છું’ તેમ કહીને બોલાચાલી કરી ધમકી આપેલી કે ‘પૈસા તો તારે આપવા જ પડશે નહિંતર જાનથી મારી નાખીશું’

માતાએ આ ત્રિપુટીને પુત્ર પૈસા ના આપે તો પોતે ચૂકવી આપશે તેવી ખાતરી આપી, ચા પીવડાવીને રવાના કરેલાં. થોડીકવાર બાદ શ્યામ ગઢવી ફરી પાછો ઘરે આવેલો અને ફળિયામાં બાંધેલો ઘોડો છોડીને જતો રહેલો. તે સમયે રશીદાબેને તેને જણાવેલું કે ‘સારું,  તમે ઘોડો લઈ જાવ જેથી પૈસાની મેટર પૂરી થાય’

થોડીકવાર બાદ શેરીના લોકોએ રશીદાબેનના ઘેર આવીને જાણ કરેલી કે બહાર કેટલાંક લોકો ઈમ્તિયાઝને મારે છે. રશીદાબેને દોડીને બહાર જઈને જોયું તો તેમનો પુત્ર લોહીલુહાણ હાલતમાં સ્કુલના ગેટ પાસે પડેલો. મિત્રો અને ગ્રામજનોએ તેને હોસ્પિટલમાં સારવાર માટે ખસેડયો હતો પરંતુ ડાબા પગના પાછળના ભાગે તીક્ષ્ણ હથિયારથી થયેલી ઈજામાં વધુ પડતું લોહી વહી જવાથી ઈમ્તિયાઝે દમ તોડી દીધો હતો. પોલીસે હત્યા સહિતની કલમો હેઠળ ગુનો નોંધી તપાસ હાથ ધરી છે.