કચ્છના અખાતમાં આવેલી કંડલા પોર્ટ હસ્તકની સમુદ્રી ખાડીમાં મીઠું પકવતાં સોલ્ટ માફિયાઓએ ચેરિયાનો સોથ વાળીને ગેરકાયદે રીતે મીઠાંના કારખાના બનાવી દીધા હોવાની અને પાળાના કારણે સમુદ્રી ભરતીનું પાણી રોકાઈ જતાં અનેક નાની નાની ક્રીક સૂકાઈને પૂરાઈ ગઈ હોવાના પોલ્યુશન કંટ્રોલ બોર્ડના અહેવાલના પગલે ફેબ્રુઆરી ૨૦૨૫માં NGTએ પોર્ટ ઑથોરીટીને દબાણો હટાવવા હુકમ કરેલો.

જેના પગલે NGTએ સ્ટેટ અને સેન્ટ્રલ ગવર્નમેન્ટના પ્રદૂષણ નિયંત્રણ બૉર્ડને આ ખાડીની સંયુક્ત જાત તપાસ કરી અહેવાલ આપવા હુકમ કરેલો. NGTએ દબાણો દૂર કરવા સાથે ચેરિયાના પુનઃસ્થાપન માટે વન તંત્ર અને દિન દયાળ પોર્ટને સમય મર્યાદા દર્શાવતો એક્શન પ્લાન રજૂ કરવા હુકમ કર્યો હતો.

કંડલા પોર્ટ દ્વારા ૧૧૦ પોલીસ કર્મચારીઓના બંદોબસ્ત સાથે ૨૦થી વધુ હિટાચી, ૬ જેસીબી વડે દરરોજ સવારે આઠ વાગ્યાથી ગેરકાયદે બનેલાં પાળાઓ તોડી પડાઈ રહ્યાં છે.

ચેરમેન સુશીલ સિંઘના માર્ગદર્શન તળે વાઈસ એન્જિનિયર શ્રીનિવાસ રાવ, ઓમપ્રકાશ દાદલાણી (ટ્રેડ પ્રમોશન અને પબ્લિક રિલેશન્સ ઓફિસર) અને અન્ય અધિકારીઓ આ મેગા ડ્રાઈવમાં જોડાયાં છે. આગામી દિવસોમાં લીઝ મેળવીને આસપાસના વિસ્તારોમાં ગેરકાયદે દબાણ કરનારાં મીઠાના કારખાનાઓ સામે પણ ઝુંબેશ છેડવામાં આવશે તેવો પણ પોર્ટ પ્રશાસને નિર્દેશ આપ્યો છે.