પોલીસે ઝડપેલાં વિક્રમ બ્રહ્મદેવ તીવારી અને રાજદીપસિંહ દશરથસિંહ જાડેજા (રહે. કુંદરોડી, મુંદરા)એ પોલીસ સમક્ષ મુખ્ય બૂટલેગર ગજુભા ભીમાજી જાડેજા (રહે. નવીનાળ) અને કિશનસિંહ દશરથસિંહ જાડેજા (કુંદરોડી)એ દેશી દારૂના વેચાણ માટે ગોઠવેલાં સુવ્યવસ્થિત નેટવર્કના વટાણાં વેરી નાખ્યાં છે. પોલીસે બેઉની કબૂલાતના આધારે બેઉ મુખ્ય બૂટલેગરો અને તેમના અન્ય આઠ સાગરીતો તથા પગારદાર મજૂરો સામે પ્રોહિબિશનની ધારાઓ તળે ગુનો દાખલ કર્યો છે.

પોલીસે ફરિયાદમાં દર્શાવેલા બે મુખ્ય આરોપી પૈકીનો એક ગજુભા ભીમાજી જાડેજા ભૂતકાળમાં નવીનાળ ગામનો સરપંચ અને મુંદરા તાલુકા કોંગ્રેસના પ્રમુખપદે રહી ચૂકેલો છે. ગુનાહિત પ્રવૃત્તિઓને અનુલક્ષીને ૨૦૨૦ અને ૨૦૧૫માં તેની સામે પાસા હેઠળ પણ કાર્યવાહી થયેલી છે. ૨૦૨૪માં સ્ટેટ મોનિટરીંગ સેલની ટીમે ગજુભાના અડ્ડા પર દરોડો પાડીને દેશી દારૂનો ક્વૉલિટી કેસ કર્યો હતો.

ઝડપાયેલાં વિક્રમ તીવારીએ પોલીસને જણાવ્યું કે વવાર ગામનો બૂટલેગર ગોપાલ ગઢવી દરરોજ સવારે તૈયાર દેશી દારૂ પાલુ ગઢવીની વાડીએ આપી જાય છે. આ દેશી દારૂને કોથળીઓમાં પેક કરીને મુંદરા શહેર તાલુકાના અલગ અલગ સ્ટેન્ડ પર મોકલવામાં આવે છે.

પોલીસે ઝડપેલાં વિક્રમ તીવારી અને રાજદીપ પણ બેઉ બૂટલેગર પાસે મજૂરી કરે છે. તે ઉપરાંત દારૂના આ નેટવર્કમાં તેજસ, શંભુ પાંડે, શિવમ્, જગદીશ ચાવડા પણ મજૂરી કરે છે. મુંદરા પોલીસે ગજુભા જાડેજા અને રાજદીપ તથા માલ આપતા ગોપાલ ગઢવી, વાડી માલિક પાલુ ગઢવી અને નેટવર્કમાં કામ કરતાં છ મજૂરો મળી કુલ દસ લોકો વિરુધ્ધ ગુનો દાખલ કરી નહીં પકડાયેલાં આઠ લોકોને પકડવા માટે તજવીજ હાથ ધરી છે.