૨૮-૧૦-૨૦૨૩ના રોજ પત્રી ગામ નજીક ગામના રાજકીય અને સામાજિક આગેવાન પૃથ્વીરાજસિંહ જાડેજા પર લોડર ચઢાવીને ક્રૂરતાપૂર્વક હત્યા કરી દેવાઈ હતી. મૃતકે ગામની મહિલા સરપંચ પ્રવિણાબેન ચાડ કે જે વેજીની દીકરી હતી તેની વિરુધ્ધ કરેલી રેતી ચોરીની ફરિયાદોના પગલે તેને થયેલા દંડ તથા અવિશ્વાસની દરખાસ્ત પસાર કરાવીને સરપંચના હોદ્દા પરથી તેને પદભ્રષ્ટ કરાવી હતી.

બનાવ અંગે મૃતકના નાના ભાઈ રઘુવીરસિંહ દિલીપસિંહ જાડેજાએ તમામ સામે ફરિયાદ નોંધાવેલી. આ કેસ હાલ ભુજ સેશન્સ કૉર્ટમાં ન્યાયાધીન છે. ફરિયાદી રઘુવીરની જુબાની લેવાની બાકી છે.

આજે સવારે રઘુવીર વાળ કપાવવા માટે ગામમાં જતો હતો ત્યારે રસ્તામાં સામે વેજી ચાડ અને કાજલ ચેતનબેન મળ્યાં હતા. વેજીએ રઘુને ગાળો ભાંડવાનું શરૂ કરતાં તેણે પોલીસને જાણ કરવા પ્રયાસ કરેલો. તે જોઈને વેજી જોડે રહેલી કાજલે ફોન કરીને વેજીના દીકરા નંદવીરને જાણ કરેલી. થોડીકવાર બાદ નંદવીર તેની સાથે કામ કરતાં માણસ મુકેશ જેઠાભાઈ આહીર સાથે સ્કોર્પિયો કાર લઈને સ્થળ પર ધસી આવ્યો હતો.

સરાજાહેર ગામમાંથી અપહરણ કર્યું હોઈ તથા લોકોએ ગાડીને અટકાવવા માટે પ્રયાસો શરૂ કરતાં આરોપીઓ રઘુને ગામમાં ગોળ ગોળ ફેરવીને અંતે બચવા માટે સીધા પ્રાગપર પોલીસ સ્ટેશન લઈ ગયેલાં. પ્રાગપર પોલીસે વેજી ચાડ, તેના ફરજંદ નંદવીર અને મુકેશ આહીર વિરુધ્ધ ફરિયાદ દાખલ કરી છે.

વેજી ચાડ અને તેના પતિ વાલજી ચાડનો ગંભીર ગુનાહિત ઈતિહાસ છે. ૨૦૧૫માં પારકી જમીન પચાવી પાડવાના પ્રયાસ સબબ તેમણે આધેડ વયની જૈન મહિલાની હત્યાનો પ્રયાસ કરેલો. જેમાં ૨૦૧૮માં બેઉને પાંચ વર્ષની કેદની સજા થયેલી.

આ અંગે મુંદરા પોલીસ મથકે એટ્રોસિટી સહિતની કલમો તળે ગુનો નોંધાયેલો.

એ જ રીતે, અવિશ્વાસની દરખાસ્ત સમયે પુત્રીની તરફેણમાં મત મેળવવા વેજી અને તેના બેઉ ફરજંદ નંદવીર અને વિઠ્ઠલે પંચાયત સદસ્ય કેતન ચોથાણીનું ક્રેટા કારમાં અપહરણ કરીને ધાક ધમકી કરતાં તે અંગે પણ પ્રાગપર પોલીસ મથકે ગંભીર કલમો તળે ફરિયાદ નોંધાઈ હતી. તો, ગામની અન્ય એક મહિલાને વેજી અને તેના પરિવારે માર મારીને સોનાની બુટ્ટીની લૂંટ કરી હોવાની ફરિયાદ પણ નોંધાઈ હતી.