ગેરકાયદે કનેક્શન કન્ફર્મ કર્યાં બાદ પરોઢે ચાર વાગ્યે અધિકારીઓનો કાફલો ગાડીઓમાં ધસી ગયો હતો. મુંદરાના ભદ્રેશ્વર ગામની સીમમાં આવેલા એક મીઠાના કારખાનામાં ડાયરેક્ટ વીજ ટ્રાન્સફોર્મરમાંથી વીજ જોડાણ ખેંચીને વીજળીની ચોરી કરાતી હતી. ૯૯ કિલોવોટનો લોડ ધરાવતું આ જોડાણ મીટરને બાયપાસ કરીને લેવાયું હતું.

કારખાનેદારે ૮૦ લાખ ભરીને કેસની માંડવાળ કરેલી તેમ મુંદરાના નાયબ ઇજનેર એમ.આર. મોદીએ ઉમેર્યું હતું. વીજ તંત્રના ચોપડે વીજ જોડાણ શૈલેષભાઈ શામજીભાઈ ડાંગરના નામે બોલે છે.

હકીકતમાં આ કારખાનું કચ્છ જિલ્લા ભાજપના અંજાર નજીક રહેતા એક આગેવાનના સગાં ભાઈનું હોવાનું જાણકારોએ દાવો કર્યો છે. આ આગેવાનનો ભત્રીજો થોડાંક સમય અગાઉ અઢી કરોડની મીઠા ચોરીના ગુનામાં પણ ભચાઉ પોલીસના હાથે ઝડપાયેલો છે. વક્રતા એ છે કે જેનું મીઠું ચોરાયું છે તે કંપનીનો માલિક અને ચોરીમાં ઝડપાયેલો આગેવાનનો ભત્રીજો બેઉ સામાજિક સંબંધોથી જોડાયેલાં છે, એટલે કે ‘ઘર કા ભેદી લંકા ઢાયે’ જેવો ઘાટ સર્જાયો છે.