મુંદરાના વિરાણીયા ગામનો અશ્વિન મહેશ્વરી મુંદરાના મોટા કપાયા પાસે આવેલા વોલ્વો ગૃપ-આઈશર મોટર્સ લિમિટેડ (VE કૉમર્સિયલ વેહિકલ્સ લિ.)ના વર્કશોપમાં આસિસ્ટન્ટ ટેકનિશિયન તરીકે નોકરી કરે છે. થોડાંક સમય અગાઉ તાલીમ લેવા માટે કંપનીએ તેને અન્યત્ર મોકલેલો. જે પેટે થયેલાં ખર્ચના જરૂરી બિલો તેણે વર્કશોપના સર્વિસ એડવાઈઝર દીપક નાઈને આપ્યાં હતા. દીપક નાઈથી આ બિલ ખોવાઈ ગયેલાં.

૧૫ ઑગસ્ટની રાત્રે નવેક વાગ્યાના અરસામાં અશ્વિને ‘તમે મારા ટીએ ડીએના બિલ ખોઈ નાખતાં કંપની તરફથી મને ૧૫ હજાર રૂપિયા મળતાં નથી’ કહીને દીપક નાઈ જોડે ઝઘડો કરવાનું શરૂ કરેલું. અશ્વિને ભૂંડી ગાળો ભાંડવાનું શરૂ કરતાં દીપક નાઈ ડરી જઈને વર્કશોપમાં આવેલા પોતાના રૂમમાં નાસી ગયેલો. અશ્વિને દીપકની પાછળ પાછળ જઈને રૂમનો દરવાજો ખોલવા કહેલું.

વર્કશોપના અન્ય એક કર્મચારીએ વચ્ચે પડીને દીપકને મારથી બચાવ્યો હતો. ડરી ગયેલો દીપક અશ્વિનના ગુસ્સાથી બચવા માટે થોડેક દૂર આવેલી એક હોટેલ પર જતો રહેલો.

પિત્તો ગુમાવી ચૂકેલાં અશ્વિને વર્કશોપમાં પડેલી ચાર આઈશર ગાડીના કાચ તોડી નાખ્યાં હતા. જૉબકાર્ડ માટે રાખેલાં ચાર ટેબલેટ, ઑફિસમાં રહેલાં કૉમપ્યુટર, સિક્યોરીટી ઑફિસમાં રહેલું ટીવી અને અન્ય સામાન, ઑફિસમાં પ્રવેશવાનો કાચનો મુખ્ય દરવાજામાં ભારે તોડફોડ કરીને બધું રમણ ભમણ કરી નાખ્યું હતું. આટલેથી નહીં અટકીને અશ્વિને સિક્યોરીટી ગાર્ડ પાસે રહેલી સ્ટોર રૂમની ચાવી આંચકીને, સ્ટોર રૂમ ખોલી તેમાં રહેલાં કિંમતી નવા સ્પેરપાર્ટસ પર ઓઈલ છાંટીને આગ ચાંપી દીધી હતી. બનાવ અંગે જાણ થતાં કંપનીના ઉચ્ચ અધિકારીઓ આજે મુંદરા દોડી આવ્યાં હતા.