પ્રાથમિક તબક્કે બે બેન્ક ખાતાઓમાં જ ૧.૩૩ કરોડનું ગેરકાયદે ટ્રાન્ઝેક્શન થયું હોવાનું બહાર આવ્યું છે.

અંજારના રોટરીનગરમાં રહેતા હાર્દિક ઉદયભાઈ ભાટીયા (સરૈયા)એ પોતાને બેન્કમાંથી મળેલી નોટિસ અન્વયે સાયબર ક્રાઈમ પોલીસ સ્ટેશનને એક અરજી કરેલી. હાર્દિકે પોલીસને જણાવ્યું કે બાકી લ્હેણીની વસૂલી પેટે તેના મિત્ર પાર્થ ચેતનભાઈ ઝાલા (રહે. ભાવેશ્વરનગર-3, અંજાર)એ  ત્રણ મહિના અગાઉ તેની પાસે બે બેન્ક એકાઉન્ટ ભાડેથી વાપરવા માટે માગેલાં. હાર્દિકે ગુજરાત ગ્રામિણ બેન્ક અને કેડીસીસી બેન્કની અંજાર શાખાના પોતાના બે ખાતાં પાર્થને ઉપયોગ કરવા આપેલાં. આ બેઉ બેન્ક ખાતાંઓમાં ૧.૩૩ કરોડના ગેરકાયદે આર્થિક વ્યવહારો થયેલાં. જે અન્વયે હાર્દિકને બેન્કમાંથી નોટિસ મળેલી.  

પોલીસે પાર્થ ઝાલાને બોલાવીને પૂછપરછ કરતાં તેણે જણાવ્યું કે ગાંધીધામના જૉન શેઠ ઊર્ફે બિટ્ટુ તેનો મિત્ર છે. બિટ્ટુના કહેવાથી તે જુદાં જુદાં લોકોના બેન્ક ખાતાં તેને ખાતાંદીઠ ૨૦ હજાર રૂપિયાના કમિશનથી ભાડે આપે છે. પાર્થે પોતાના અંગત ત્રણ બેન્ક ખાતાં અને હાર્દિકના બે બેન્ક ખાતાં બિટ્ટુને ભાડે આપેલાં. પોલીસે પાર્થનો ફોન ચેક કરતાં આ રેકેટમાં સામેલ અશ્વિન ગોવિંદભાઈ કાનાણી (ક્રિષ્નાનગર સોસાયટી, અંજાર મૂળ રહે. લાઠી, અમરેલી) અને વત્સલ ઊર્ફે વિશાલ અનિલભાઈ ઠક્કર (ગાંધીધામ)ની વિગતો મળેલી.

પોલીસે અશ્વિનની પૂછપરછ કરતાં બહાર આવ્યું કે પાર્થે તેનો સંપર્ક બિટ્ટુ સાથે કરાવ્યો હતો. અશ્વિને પોતે પાંચ બેન્ક ખાતાં ખોલાવીને બિટ્ટુને ભાડે આપેલાં. એટલું જ નહીં, પોતાના અન્ય પરિચિતો દિનેશ દાતણીયા, ઈમરાન અને સુલતાન રાયમા, પ્રદીપસિંહ ઝાલા, ચંદ્રશેખર ભાભણીયાના બેન્ક ખાતાં ખોલાવીને બિટ્ટુને ભાડે આપેલાં. બિટ્ટુ પાસેથી પ્રતિ બેન્ક ખાતાંદીઠ તે ૨૦ હજાર મેળવી અડધા રૂપિયા પોતાની પાસે રાખી પરિચિતોને ૧૦-૧૦ હજાર રૂપિયા આપતો.

અશ્વિનની પૂછપરછમાં બહાર આવ્યું કે તેના બે કૌટુંબિક ભાઈ વશરામ ઊર્ફે કાળુ કાનાણી (રહે. જીઆઈડીસી, ગાંધીધામ) અને કિશન જગદીશભાઈ વાંજા (રહે. જીઆઈડીસી ઝૂંપડા, ગાંધીધામ) બિટ્ટુના સર્વિસ સ્ટેશનમાં કામ કરતાં હોઈ બેઉ તેના સીધા સંપર્કમાં છે. વશરામ અને કિશન પણ આ રેકેટમાં સામેલ છે. પોલીસે વશરામની પૂછપરછ કરતાં તેણે પોતે બિટ્ટુને પંદર વરસથી ઓળખતો હોવાનું અને બિટ્ટુ ખાતાંદીઠ પાંચ હજાર રૂપિયા કમિશન આપતો હોવાનું જણાવી કમિશનની લાલચમાં તેણે વ્યક્તિગત ત્રણ ખાતાં તથા પોતાની પત્ની, બે સાળી, એક સાઢુભાઈના નામના સાત ખાતાં તથા ભુજમાં રહેતા ત્રણ મિત્રોના આઠ ખાતાં મળી ૧૮ બેન્ક ખાતાં પાંચ હજારના કમિશનથી ભાડે આપ્યાં હોવાનું કબૂલ્યું હતું. એ જ રીતે, કિશન વાંજાએ પણ છ બેન્ક ખાતાં ભાડે આપ્યાં હોવાનું બહાર આવ્યું હતું.

બિટ્ટુનો મિત્ર વત્સલ ઊર્ફે વિશાલ ઠક્કર (રહે. ગાંધીધામ) બેન્ક ખાતાંધારકોની પાસબૂક, બેન્કમાંથી મળતી કીટ, ખાતામાં નોંધાવેલા મોબાઈલ નંબરના સીમકાર્ડ વગેરે બિટ્ટુએ જણાવેલાં સરનામા પર કૂરિયરથી પાર્સલ મોકલી આપતો અને બદલામાં તેને બે હજાર રૂપિયા કમિશન મળતું. બેન્ક ખાતાંઓના કમિશનની લેવડ દેવડનો હિસાબ બિટ્ટુનો સાગરીત કિશન ઊર્ફે કુલદીપ બારોટ રાખતો હોવાનું સ્પષ્ટ થયું છે. કિશનના વોટસએપમાંથી વધુ ૬૯ ખાતાંની વિગતો મળી છે. એ જ રીતે, અંજારના સિનોગ્રાના વકાર હુસેન હોડાએ પણ આ રીતે ૨૫ બેન્ક ખાતાંઓ ખોલાવીને બિટ્ટુને તેને લગતી વિગતો મોકલાવી હોવાનું ખૂલ્યું છે.

આરોપીઓની પૂછતાછમાં ભાડે અપાયેલાં બેન્ક ખાતાંના આધારે સાયબર ક્રાઈમ પોલીસે સમન્વય પોર્ટલ પર તપાસ કરતાં આ ખાતાંઓમાં સાયબર ફ્રોડથી રૂપિયા જમા થયાં હોવાની ૧૨૭ ફરિયાદો નોંધાઈ હોવાનું સ્પષ્ટ થયું છે. જરૂરતમંદ લોકોને કમિશનની લાલચ આપીને તેમના નામે ખૂલેલાં બેન્ક ખાતાં સાયબર માફિયાઓને આપીને તેમાં વિવિધ પ્રકારે લોકો સાથે આચરાતાં ફ્રોડની રકમ જમા થતી હોવાનું સ્પષ્ટ થયું છે. પોલીસે પાર્થ ઝાલા, અશ્વિન કાનાણી, વશરામ કાનાણી, કિશન વાંજા, વકાર હોડા, કિશન બારોટ, વત્સલ ઠક્કર અને બિટ્ટુ સહિતના આઠે સામે ગુનો નોંધી ઝીણવટભરી તપાસ હાથ ધરી છે. પીઆઈ બી.વી. બોરીસાગરે બિટ્ટુ, વકાર અને કિશન બારોટ સિવાય અન્ય પાંચ જણાંની ધરપકડ કરી મંગળવાર સુધીના રિમાન્ડ મેળવ્યાં છે.