બનાવ અંગે શબાબુલ મલિક નામના મૂળ ઉત્તર પ્રદેશના યુવકે નવીનાળના ભીખુભા સોઢા અને મેઘરાજ પઢિયાર તથા તેમના બે અજાણ્યા સાગરીતો સામે ફરિયાદ નોંધાવી છે.

શબાબુલ મુંદરામાં ફર્નિચર કટીંગનું કામ કરે છે. શુક્રવારે તે તેના રૂમ પાર્ટનર રાશિમ મલિક, મોહમ્મહ ઝુબૈર મલિક, શાહરૂખ અન્સારી, અફઝાલ મલિક સાથે જુમ્માની નમાઝ અદા કરવા નવીનાળની મસ્જિદે આવેલો. બપોરે બે વાગ્યે તેઓ પરત જતા હતા ત્યારે પ્રાથમિક શાળા પાસે ઊભેલાં ભીખા, મેઘરાજ તથા તેમના બે સાગરીતે ચારે યુવકોને આંતર્યાં હતા. તુમ લોગ ઈધર ક્યોં આયે હૌ? બાહર કે લોગોં કો યહાં આના મના હૈ કહીને ચારે જણે ભૂંડી ગાળો ભાંડીને તેમના પર હુમલો કરેલો. એક જણના હાથમાં લાકડી હતી જે તેણે શાહરૂખના માથામાં ફટકારી દીધી હતી.

બબાલના પગલે ટોળું એકઠું થતાં ચારે જણ ફરી આવશો તો જાનથી મારી નાખશું કહીને સરકી ગયાં હતા. ચારે યુવકોને પ્રાથમિક સારવાર માટે મુંદરાની સરકારી હોસ્પિટલમાં દાખલ કરાયાં હતા. શાહરૂખને માથામાં દુઃખાવો થતો હોઈ વધુ સારવાર માટે ભુજ રીફર કરાયો છે. ઘટના અંગે મુસ્લિમ સંગઠનોએ વિરોધ પ્રદર્શિત કરી પોલીસને કડક પગલાં લેવા અનુરોધ કર્યો છે. અગાઉ પણ આ રીતે પરપ્રાંતીય યુવકો પર  હુમલો થયો હોવાનું જણાવાયું છે.