માધાપર નવાવાસ ખાતે ચારણિયા વાસમાં રહેતા ૨૮ વર્ષિય ધીરજ ભાટીયા (ચારણીયા)ના ૬૮ વર્ષિય પિતા મોહનલાલ જખરાભાઈ ચારણીયાએ ગત ૮ ડિસેમ્બરની બપોરે ઘર નજીક આવેલા ભંગારના વાડામાં એસિડ પી લીધું હતું. મોહનલાલને ગંભીર હાલતમાં જી.કે. જનરલ હોસ્પિટલમાં સારવાર માટે ખસેડાયેલાં પરંતુ સારવાર કારગત નીવડી નહોતી અને તેમનું મૃત્યુ નીપજ્યું હતું.

વૃધ્ધ પિતાએ અચાનક આવું અંતિમ પગલું શા માટે ભરી લીધું તે રહસ્ય પર તેમની અંતિમ વિદાય સાથે જ પડદો પડી ગયો હતો. જો કે, મોહનલાલે મરતાં પૂર્વે સ્યુસાઈડ નોટ લખેલી અને તે ચિઠ્ઠી પૂર્વ કચ્છ એસપીને મોકલી હતી. પૂર્વ કચ્છ એસપીએ બનાવ માધાપર પોલીસ સ્ટેશનની હદનો હોઈ ટપાલ મારફતે આ ચિઠ્ઠી માધાપર પોલીસ સ્ટેશન ખાતે મોકલી આપતા મોહનલાલના આપઘાત પાછળના કારણનો ઘટસ્ફોટ થયો હતો.

મોહનલાલે ચિઠ્ઠીમાં પોતે પુત્ર ધીરજના સાસરિયાઓના ત્રાસથી અંતિમ પગલું ભરતાં હોવાનું લખ્યું હતું. ધીરજે પોલીસને જણાવ્યું કે બે વર્ષ અગાઉ તેના લગ્ન અમદાવાદના ઠક્કરનગરમાં વસંતનગર ઝૂંપડામાં રહેતા ભીમજી શિવજીભાઈ ધરડાની દીકરી દયાબેન સાથે થયાં હતા. સંતાનમાં આઠ માસનો એક પુત્ર છે. બે વર્ષના લગ્નજીવન દરમિયાન પત્ની દયાના લીધે ઘરમાં કાયમ કંકાસ સર્જાતો રહ્યો છે.

તેમના માનસિક ત્રાસથી કંટાળીને મોહનલાલે આત્મહત્યા કરી લીધી હતી. માધાપર પોલીસે મરનારની પુત્રવધૂ દયા, દયાની માતા પ્રેમિલાબેન અને પિતા ભીમજી ધરડા તથા કાકા હરેશ ધરડા વિરુધ્ધ ગુનો નોંધી તપાસ હાથ ધરી છે.