મુંદરાની શાહબજાર પાસે આવેલી બુખારી પીરની દરગાહના બુખારી ૫૫ વર્ષિય ઈર્શાદ ઊલ હક્ક નૌશાદમિંયા બુખારી ગત ગુરુવારે સવારે પોતાનું મોપેડ લઈને મુંદરાની સાનિયા સોસાયટીમાં આવેલા પ્લોટ પર ચક્કર મારવા ગયેલાં. ચક્કર મારીને પરત ફરતાં હતા ત્યારે રસ્તામાં ત્રણ જણે તેમને ‘હનીફભાઈનો ફોન છે’ કહીને ઊભાં રખાવેલાં. ત્રિપુટી પૈકીનો એક જણો સમીર જત હતો અને બાકીના બે અજાણ્યા યુવકો હતા.

ત્રણે જણે સ્પીકર પર ફોન રાખીને હનીફ જોડે વાત કરાવેલી. હનીફે ભૂંડી ગાળો ભાંડીને બુખારીને ધમકી આપેલી કે ‘તારે અને તારા પાર્ટનર બટુકસિંહને આ પ્રોપર્ટીમાં આવવાની મનાઈ છે. ફરી અહીં આવ્યો તો જાનથી મારી નાખીશ’ હનીફે ફોન પર તેના માણસોને હુમલો કરવા સૂચના આપતાં ત્રિપુટીએ તેમને મુક્કાં લાતોથી મુઢ માર માર્યો હતો.

મૂલ્યવાન પ્રોપર્ટીના વિખવાદમાં પોતાના પર હુમલો કરાયો હોવાનું અને તેની પાછળ મુંદરા તથા માંડવી રહેતા સત્તાધારી પાર્ટીના કેટલાંક મોટાં માથાંનો પણ દોરીસંચાર હોવાનો બુખારીએ ગંભીર આરોપ કર્યો છે. બનાવ અંગે મુંદરા પોલીસે હનીફ હસનઅલી જત, સમીર જત અને અન્ય બે અજાણ્યા યુવકો સામે ગુનો નોંધી તપાસ હાથ ધરી છે.