બાતમીના આધારે ચોથી સપ્ટેમ્બરની મધરાતે દોઢ-બે વાગ્યે નખત્રાણાના પ્રાંત અધિકારી IAS ઉત્કર્ષ ઉજ્જવલ તેમના ડ્રાઈવર ભીમા રબારી સાથે ગાડી લઈને મુરચબાણ સીમમાં દોડી ગયેલાં. સ્થળ પર હિટાચી મશિન અને ટ્રકો પડ્યા હતા. બેન્ટોનાઈટનું ખનન થતું હતું. ઉત્કર્ષ ઉજ્જવલે સ્થળ પર હાજર રાજુ રબારી, લાખુભા જાડેજા અને એક અન્ય અજાણ્યા શખ્સને પોતાની પ્રાંત અધિકારી તરીકે ઓળખાણ આપીને તેમની પાસે ખનિજ ખનન અને ટ્રાન્સપોર્ટેશન માટેના આધાર પુરાવા માગ્યા હતા.

બનાવ બાદ પ્રાંત અધિકારીએ મધરાતે બે વાગ્યે દયાપર મામલતદાર નવીનભાઈ મારુને ફોન કરી ટીમ સાથે સ્થળ પર બોલાવ્યાં હતા.

ઘટના ચોથી સપ્ટેમ્બરની મધરાતે બની હતી. ખનિજ ચોરોએ પથ્થરમારો કર્યો તે અંગે મામલતદારે છેક પાંચમા દિવસે એટલે નવમી સપ્ટેમ્બરની સાંજે વિધિવત્ ફરિયાદ નોંધાવી! પ્રાંત અધિકારી ઉત્કર્ષ ઉજ્જવલ ૨૦૨૩ની ગુજરાત કેડરના IAS છે.

આ કેસમાં તેમણે દયાપર મામલતદારને ફરિયાદ નોંધાવવા અધિકૃત કર્યાં હોઈ મામલતદારે ફરિયાદ નોંધાવી છે. શું આ પ્રક્રિયામાં પાંચ દિવસ વીતી જાય? રામ જાણે..!

બાતમી મળ્યાં બાદ IAS ઉજ્જવલે પોતાની ગાડીના ડ્રાઈવર સાથે સ્થળ પર દોડી જઈને રેઈડ કરેલી. સામાન્ય રીતે સરકારી વિભાગો ગેરકાયદે પ્રવૃત્તિ થતી હોય અને સમય સંજોગ સાનુકૂળ ના હોય તો પોલીસને સાથે રાખીને દરોડો પાડતાં હોય છે.

સંભવ છે કે પોલીસ આ ખનિજ ચોરી સામે આંખ આડા કાન કરતી હોવાની તથા તેને જાણ કરવાથી ગુપ્ત બાતમી ખનિજ ચોરો સુધી લીક થઈ જવાની આશંકાના કારણે પ્રાંત અધિકારીએ પોલીસને જાણ ના કરી હોય. પરંતુ, સ્થળ પર પહોંચીને ખનિજ ચોરીનો પર્દાફાશ કર્યાં બાદ તથા પથ્થરમારો થયાં બાદ તેમણે પોલીસને શા માટે જાણ ના કરી તે એક મોટો સવાલ છે.

ફરિયાદમાં જણાવ્યા મુજબ પથ્થરમારાની ઘટનામાં પ્રાંત અધિકારી કે તેમના ડ્રાઈવરને તસુભાર ઉઝરડો થયો નથી. તેમની ગાડીને જરાસરખો સ્ક્રેચ પડ્યો નથી. અમુક જાણકારો તો પથ્થરમારાની વાત જ ઉપજાવી કઢાયેલી હોવાની ગોસિપ કરે છે. આવી ગોસિપને જૂઠ્ઠી માનીને ખનિજ ચોરી અટકાવવા અંગે પ્રાંત અધિકારીની તત્પરતા અને પ્રતિબધ્ધતાને પ્રાધાન્ય આપીએ તો પણ સવાલ તો એ ઊભો રહે છે કે જે મામલતદારે ફરિયાદ નોંધાવી છે તે મામલતદાર તો બનાવ બન્યાં બાદ ત્યાં આવેલાં.

ફરિયાદી મામલતદાર બનાવ સમયે હાજર નહોતા. તેમણે બનાવ નજરે જોયેલો નથી કે ના કોઈ આરોપીને નજરે જોયેલો. ત્યારે કૉર્ટમાં આ ફરિયાદ સ્વતંત્ર અને પ્રત્યક્ષ પુરાવા વગર કેવળ ફરિયાદી મામલતદારે માત્ર પ્રાંત અધિકારીએ કહેલી અને તેમણે સાંભળેલી વાત (hearsay)ના આધારે કેટલી ટકશે? પ્રાંત અધિકારીએ ઘટનાના પ્રત્યક્ષદર્શી એવા પોતાના ડ્રાઈવરને શા માટે ફરિયાદ નોંધાવવા સૂચના ના આપી? કચ્છખબરે આ સવાલો અંગે ઉત્કર્ષ ઉજ્જવલનો પ્રત્યુત્તર મેળવવા વારંવાર ફોન કૉલ કર્યાં, મેસેજ કર્યાં પણ કશો પ્રતિભાવ સાંપડ્યો નથી.