જહાજના એન્જિન રૂમ સહિતના ભાગોમાં પાણી ભરાવાનું શરૂ થતાં તે જળસમાધિ લઈ લે તેવી શક્યતાઓ સર્જાઈ છે. ઘટના અંગે જાણ થતાં કંડલા પોર્ટ પ્રશાસને તત્કાળ બે ટગને સહાયતા માટે મોકલી આપી છે. બીજી તરફ, કોસ્ટગાર્ડના બે વેસલ્સ પણ દુર્ઘટનાગ્રસ્ત જહાજ નજીક રેસ્ક્યુ માટે દોડી ગયાં છે.

પોર્ટના પ્રવક્તા ઓમપ્રકાશ દાદલાણીએ જણાવ્યું કે કોસ્ટગાર્ડ દ્વારા જહાજમાં સવાર ૨૪ પૈકી ૨૧ ક્રૂને સફળતાપૂર્વક રેસ્ક્યુ કરી લેવાયાં છે. હાલ આ જહાજમાં કેપ્ટન અને બે ચીફ એન્જિનિયર ઓન ડ્યુટી છે અને જહાજના માલિક તથા સાલ્વેજ ઓપરેશન અંગે જરૂરી સૂચનાઓની આપ-લે કરી રહ્યાં છે.

સમુદ્રમાં જ્યારે બે જહાજ વચ્ચે ટક્કર થાય અને એક જહાજ પાણીમાં ધીમે ધીમે ડૂબવા માંડે ત્યારે ડૂબતાં જહાજના બચાવ (સાલ્વેજ)ના પડકાર સાથે તેમાં રહેલાં ક્રૂડ ઓઈલ, કોલ, ફર્ટિલાઈઝર, કેમિકલ વગેરે જેવા હજારો ટન કાર્ગોથી પાણી પ્રદૂષિત થવાનો ગંભીર ખતરો સર્જાતો હોય છે. આવા સમયે કોસ્ટગાર્ડ સાથે શિપીંગ મિનિસ્ટ્રી અને ડાયરેક્ટર જનરલ ઑફ શિપીંગ હેઠળનો મરિન મર્કેન્ટાઈલ ડિપાર્ટમેન્ટ એક્શનમાં આવતો હોય છે. સમુદ્રમાં પ્રદૂષણ અટકાવવાની કામગીરી પણ કોસ્ટગાર્ડની પ્રમુખ કામગીરી છે.

જહાજ પર લદાયેલો હજારો ટન કોલસો અન્ય ટગ અને શિપ મારફતે ઓનબોર્ડ અનલોડ કરવા સહિતના વિવિધ વિકલ્પો સાથે તેમાં રહેલાં જોખમો પર ઈન્સ્યોરન્સ કંપની સહિતના સંબંધિત સ્ટેકહોલ્ડર્સે તાકીદની બેઠક યોજી પરિસ્થિતિની સમીક્ષા કરી રહ્યાં છે. દુર્ઘટનાગ્રસ્ત જહાજ ચેનલમાંથી એક સાઈડ કેવી રીતે ખસેડવું તે અંગે વિચારણા ચાલી રહી છે જેથી પોર્ટમાં આવ-જા કરતાં અન્ય જહાજોના નેવિગેશનમાં કોઈ અવરોધ ના સર્જાય.