ઘણાં કેદીઓ કૉર્ટની મુદ્દતે આવે ત્યારે સગાં-વહાલાં કે સાગરીતોની મદદથી જાપ્તાના પોલીસ કર્મચારીઓની નજર ચૂકવીને ખિસ્સામાં પ્રતિબંધિત ચીજવસ્તુ સેરવી લેતાં હોય છે. માંડવીમાં આવા જ એક ચોંકાવનારા ઘટનાક્રમમાં પાલારા જેલથી કૉર્ટ મુદ્દતે લવાયેલાં એક કેદીને કૉર્ટ રૂમમાં જ ગાંજાની પડીકીની ડિલિવરી થઈ હોવાનો બનાવ બહાર આવ્યો છે.

માંડવીમાં નાની-મોટી ચોરીઓ, ચીલઝડપ અને છરીની અણીએ લૂંટ સહિતના ૨૫ જેટલાં ગુનાઓ આચરીને લાંબા સમયથી પાલારા જેલની હવા ખાઈ રહેલા રીઢા હિસ્ટ્રીશીટર અસગરઅલી ઓસમાણગની મિંયાણા ઊર્ફે ‘ગઝની’ને જ્યુ. મેજિસ્ટ્રેટ કૉર્ટમાં મુદ્દત હોઈ પોલીસ જાપ્તા તળે અન્ય ત્રણ કેદીઓ સાથે સોમવારે પાલારા જેલથી માંડવી કૉર્ટ લવાયો હતો.

માંડવીના પોલીસ ઈન્સ્પેક્ટર ડી.ડી. શિમ્પીએ જણાવ્યું કે કૉર્ટ રૂમમાં કોઈ અજાણ્યો માણસ ગઝનીને ગાંજાની પડીકી આપી ગયેલો. પોલીસે ગઝની તથા તેને ગાંજો આપનાર અજ્ઞાત શખ્સ વિરુધ્ધ નાર્કોટીક્સની કલમો હેઠળ ગુનો નોંધી તપાસ હાથ ધરી છે. શિમ્પીએ જણાવ્યું કે બનાવ સમયે કૉર્ટ રૂમમાં અનેક લોકો હાજર હતાં.