દયાપર પોલીસ મથકમાં ફરજ બજાવતાં બિન હથિયારી પોલીસ કોન્સ્ટેબલ દિનેશ માધાભાઈ ભરવાડ અને સાથી કોન્સ્ટેબલ ગોપીચંદ્ર રામચંદ્ર રાણા બેઉ ભુજમાં આઈજી ઈન્સ્પેક્શન અંતર્ગત યોજાયેલી પરેડમાં ભાગ લઈ બાઈક પર દયાપર પરત ફરતાં હતા. રસ્તામાં માતાના મઢ નજીક રોડ પર આશાપુરા હોટેલ પાસે ચા પીવા રોકાયાં હતા. બંને કોન્સ્ટેબલ હોટેલ બહાર મૂકેલી પ્લાસ્ટિકની ખુરશીમાં બેઠાં હતા તે સમયે જયપાલસિંહ શક્તિસિંહ સોઢા અને કાનજી બળવંતસિંહ સોઢા (બંને રહે. મેવાનગર, પધ્ધરસ લીફરી)એ પાઈપ અને ધોકા સાથે ત્યાં આવી ‘દિનેશ ભરવાડ, તારો પોલીસનો પાવર બહુ વધી ગયો છે, તું અવારનવાર અમારા પર દારૂના બહુ કેસો કરે છે અને ધંધો કરવા દેતો નથી’ કહીને હુમલો કર્યો હતો.

ઘટના અંગે જાણ થતાં દયાપર પોલીસની એક ટૂકડી સ્થળ પર પહોંચી હતી. તે સમયે જ આરોપી જયપાલનો ભાઈ ખાનજી ત્યાં બોલેરો જીપ લઈને આવતાં પોલીસે તેની જીપ ચેક કરતાં પાણીની બોટલમાં રાખેલો ૩૦૦ એમ.એલ. ઈંગ્લિશ દારૂ મળી આવ્યો હતો. પોલીસે ખાનજીને ઝડપી બોલેરો તેમજ મોબાઈલ ફોન વગેરે મુદ્દામાલ જપ્ત કર્યો હતો. દયાપર પોલીસે જયપાલ અને કાનજી વિરુધ્ધ ગુનો દાખલ કરી તપાસ હાથ ધરી છે.