સિદ્દીક ઊર્ફે ઈરફાન અલીમામદ પડિયાર નામનો યુવક ગઈકાલે સીમાડે ઢોર ચરાવવા ગયેલો અને ઝાડ પર ગળેફાંસો ખાધેલી હાલતમાં તેનો મૃતદેહ મળી આવ્યો હોવાનું પોલીસની પ્રાથમિક તપાસમાં બહાર આવ્યું છે. અપમૃત્યુ અંગે પોલીસ મથકે કોઈ જાણ કર્યા વગર તેની દફનવિધિ કરી દેવાઈ હોવાનું પણ સ્પષ્ટ થયું છે. મૃતકના થોડાંક માસ અગાઉ લગ્ન થયેલાં.

કોઈ ગુનાહિત કાવતરું ઘડીને સિદ્દીકને મરવા મજબૂર કરાયો કે કેમ અથવા તેની હત્યા કરાઈ છે કે કેમ તે અંગે ભીતિ વ્યક્ત કરાઈને વૈજ્ઞાનિક અને ફોરેન્સિક પુરાવાઓ તથા મોબાઈલ ફોન લોકેશન અને કોલ ડિટેઈલ્સ, સીસીટીવીના આધારે મૃત્યુનું વાસ્તવિક કારણ જાણી સત્ય શોધવા પોલીસને વિનંતી કરાઈ છે. બનાવને ગંભીરતાથી લઈ નખત્રાણા નાયબ પોલીસ અધીક્ષક દ્વારા શનિવારે ગહન તપાસ કરાશે તેમ પોલીસે ઉમેર્યું છે.