આદિપુરના વૉર્ડ 3-એમાં રહેતા ૬૧ વર્ષિય નિવૃત્ત ચંદુલાલ ઠાકરશી સોનાસર (ઠક્કર)એ પોલીસ ફરિયાદમાં જણાવ્યું કે સૌથી નાની પુત્રીના જાન્યુઆરીમાં લગ્ન નિરધાર્યાં હોઈ તેઓ ૨૨ નવેમ્બરની રાત્રે ઘરને તાળાં મારી સપરિવાર અમદાવાદ ખરીદી કરવા ગયેલાં. ૨૮ની પરોઢે મોટો પુત્ર અને પુત્રવધૂ ઘેર પરત ફરતાં ઘરમાં ચોરી થઈ હોવાનું માલૂમ પડ્યું હતું.

કિંમતી ચીજવસ્તુ સાથે તસ્કરો પરિવારના સદસ્યોના આધાર કાર્ડ, પાસપોર્ટ, ચૂંટણી ઓળખપત્ર વગેરે પણ ચોરી ગયાં હતાં. ચોરાયેલાં ઘરેણાંના બિલ શોધવામાં તથા લગ્ન પ્રસંગના આયોજનની વ્યસ્તતાના કારણે ફરિયાદ નોંધાવવામાં વિલંબ થયો હોવાનું ચંદુલાલે લખાવ્યું છે.

કચ્છ જિલ્લા પંચાયતમાં સફાઈ કામદાર તરીકે કામ કરતા અને માનકૂવા જૂનાવાસમાં ગુર્જરવાસમાં રહેતા શાન્તાબેન વસંતભાઈ રાઠોડના બંધ ઘરમાં ત્રાટકેલાં તસ્કરો ૮૦ હજાર રોકડાં, ૧૦ ડોલર, સાડા ૩ તોલાનો સોનાનો હાર, દોઢ તોલાની ચેઈન, સોનાની ૮ વીંટી મળી સોના-ચાંદીના અન્ય નાનાં-મોટાં દાગીના મળી ૩.૫૯ લાખની માલમતા ચોરી ગયાં હોવાનો બનાવ માનકૂવા પોલીસ મથકે નોંધાયો છે. શાન્તાબેનનો પુત્ર જયંતીલાલ માતાના ઘરની પડોશમાં રહે છે. સોમવારે સવારે મા-દીકરો નિત્યક્રમ મુજબ ભુજમાં કામે આવ્યાં હતાં. સાંજે પાંચ વાગ્યે પુત્રએ પિતાને ફોન કરી દાદીના ઘરની પાછળની બારી તૂટેલી હાલતમાં હોવાની અને ચોરી થઈ હોવાની જાણ કરી હતી.