માર્ચના આખરી સપ્તાહથી માધાપર નવા વાસની ભાગોળે આવેલી સોસાયટીઓમાં ભેદી રીતે પાણીનો કાપ મૂકાવા માંડ્યો હતો. દરરોજ પાણી છોડવાના બદલે ત્રણ ચાર દિવસે માંડ એકાદ કલાક પાણી છોડવાનું શરૂ કરાયેલું. જે પાણી આવતું તે પણ પૂરતાં દબાણ વગર આવતું. લોકો તલાટી અને સરપંચને રજૂઆત કરી કરીને થાક્યાં. ધારાસભ્યથી લઈ ટીડીઓ અને જિલ્લા કલેક્ટરને રજૂઆતો કરી પરંતુ આજ દિન સુધી નઘરોળ અને નફ્ફટ શાસકોના પેટનું પાણી હલ્યું નથી.

શરૂઆતમાં વાલ્વમેનની બેદરકારી પર દોષારોપણ કરતા શાસકો સમક્ષ હવે રજૂઆત કરાય ત્યારે હાથ અધ્ધર કરીને એવો સ્ટાન્ડર્ડ જવાબ અપાય છે કે નવી નવી સોસાયટીઓ બની રહી છે, વસ્તીમાં વધારો થઈ રહ્યો છે એટલે પાણીની તંગી સર્જાઈ રહી છે. વક્રતા એ છે કે ફેબ્રુઆરી સુધી નિયમિત પાણી મળતું હતું ત્યારે કોઈ વસ્તી વધારો નડતો નહોતો! ગયા ઉનાળે કોઈ વસ્તી વધારો નડ્યો નહોતો, બસ એક જ ઉનાળામાં વસ્તી વિસ્ફોટ થઈ ગયો!

ક્યારેક એવા જવાબ અપાય છે કે પાણીની લાઈન વર્ષોજૂની છે અને હવે તેને સમાંતર બીજી લાઈન નાખવા દરખાસ્ત કરાઈ છે. આગ લાગે ત્યારે કૂવો ખોદવા જેવો ઘાટ સર્જાયો હોય તેમ પાણીની આપૂર્તિ માટે નવો બોરવેલ ખોદવા દરખાસ્ત કરાઈ છે. કૂવો ખોદાય ત્યારે સાચું.

જો કોઈ ઉગ્ર થઈને રજૂઆત કરે કે ટેક્સ તો પૂરેપૂરો વસૂલો છો ને પાણી આપવામાં કેમ નાગાઈ કરો છો? તો બાપાએ સાત પેઢી સુધીના ગરાસમાં ગામ લખી આપ્યું હોય તેવો તોછડો જવાબ મળે છે કે ટેક્સના પૈસા પાછાં લઈને અહીંથી બીજે રહેવા જતાં રહો! પાણીની તંગીના કારણે ખાનગી ટેન્કરોવાળા માટે કમાણીની ટંકશાળ શરૂ થઈ ગઈ છે.