ભુજના જૂના રેલવે સ્ટેશન પાસે ખાદી બાગ નજીક રહેતો ૨૧ વર્ષિય વિશાલ શંભુભાઈ પ્રજાપતિ (મૂળ રહે. ઈટાવા, યુપી) પલ્સર બાઈક લઈને યક્ષના મેળે મહાલવા નીકળ્યો હતો. રાત્રે ૧૧.૩૦ના અરસામાં ભુજ નજીક સુખપર ગામે રિલાયન્સ પેટ્રોલ પંપ પાસે સામેથી આવતી સ્કોર્પિયો કારે તેને જોરદાર ટક્કર મારતાં ગંભીર ઈજાથી તેનું મૃત્યુ નીપજ્યું હતું.

માનકૂવા પોલીસ મથકે મૃતકના કાકાએ લખાવેલી ફરિયાદમાં જણાવ્યું છે કે આગળ જતી ટ્રકને ઓવરટેક કરવાની લ્હાયમાં GJ-12 P-4700 નંબરની સ્કોર્પિયો કારના ચાલકે સામેથી પલ્સર પર આવી રહેલા વિશાલને ટક્કર મારી દીધી હતી. મૃતક વિશાલના પિતા અને કાકા બેઉ પાણીપુરી વેચવાનો ધંધો કરે છે.

ભચાઉના બટિયા પુલ નીચે સર્વિસ રોડ પર જઈ રહેલા બાઈકને પાછળ આવી રહેલા ટ્રેલરે ટક્કર મારતાં બાઈક ચાલકનું મોત નીપજ્યું છે. શનિવારે રાત્રે આઠેક વાગ્યા આસપાસ દુર્ઘટના ઘટી હતી. મરણ જનાર માનસંગ જગાભાઈ કોલી (રહે. જૂનાવાડા, ભચાઉ) તેના કૌટુંબિક ભત્રીજા મનસુખને બાઈક પાછળ બેસાડી કપડાં ખરીદવા માર્કેટમાં આવ્યો હતો.

GJ-12 BV-1363 નંબરના ટ્રેલરના પાછલાં જોટા નીચે કચડાઈ જવાથી માનસંગના શરીરના બે ટૂકડાં થઈ ગયેલાં અને સ્થળ પર મૃત્યુ નીપજ્યું હતું. ટ્રેલર ચાલક થોડેક આગળ જઈ ટ્રેલરને રેઢું મૂકી નાસી ગયો હતો. બનાવ અંગે ભચાઉ પોલીસે ટ્રેલર ચાલક સામે ગુનો નોંધીને તપાસ શરૂ કરી છે.