ગત મધરાત્રે ભચાઉના વોંધ ગામની સીમમાં આવેલા તળાવ નજીક પડતર જગ્યામાં કન્ટેઈનર ટ્રકમાંથી ઈંગ્લિશનું કટીંગ થતું હતું તે ટાંકણે મધરાત્રે SMC ત્રાટકી હતી. રણવિસ્તારમાં પોલીસ  વાહન જઈ શકે તેમ ના હોઈ SMCની ટીમ બે કિલોમીટર સુધી પગપાળા ચાલીને સ્થળ પર પહોંચી હતી. પોલીસને આવતી જોઈ માલનું કટીંગ કરી રહેલા મજૂરો અને બૂટલેગરો અંધારમાં છુમંતર થઈ ગયાં હતા.

કન્ટેઈનર ટ્રકમાં લાગેલી નંબર પ્લેટ પર GJ-12 BV-8573 નંબર લખેલાં હતા. ડ્રાઈવર કેબિનની તપાસ કરતા તેમાંથી MP-09 HH-4298 નંબરની બીજી બે નંબર પ્લેટ મળી આવી હતી. પોલીસે ટ્રકના એન્જિન નંબર અને ચેસિસ નંબરના આધારે ખરાઈ કરતાં આ ટ્રકના અસલી નંબર MP-09 HH-4298 હોવાનું સ્પષ્ટ થયેલું. અર્થાત્, પોલીસને ગેરમાર્ગે દોરવા માટે કચ્છ પાસિંગની ખોટી નંબર પ્લેટ લગાડાઈ હતી.

ટ્રકની કેબિનમાંથી SMCને એક વાઈ ફાઈ રાઉટર અને સીસીટીવી કેમેરાના ફૂટેજ રેકોર્ડ કરતું ડીવીઆર મળી આવ્યું હતું. સીસીટીવી કેમેરા ડ્રાઈવર કેબિનના દરવાજાની ઉપર ફીટ કરાયેલો હતો.

કન્ટેઈનર ટ્રકમાં ૪.૫૦ લાખની કિંમતની સોયાબીનની ૨૫૦ ગુણીઓની આડમાં ભારતીય બનાવટની જુદી જુદી ત્રણ બ્રાન્ડની વ્હિસ્કીની ૭ હજાર ૮૦ બોટલ ભરેલી પેટીઓ મળી આવી હતી. આ વ્હિસ્કી પંજાબના મોહાલી અને ભટિંડાની ડિસ્ટલરીઝની છે. ટ્રકને ભચાઉ પોલીસ સ્ટેશન લઈ આવતી વખતે તે માટીમાં ખૂંપી જતા લોડરની મદદથી બહાર કઢાઈ હતી.

દારૂનો જથ્થો ભચાઉના રીઢા બૂટલેગર અશોકસિંહ ઊર્ફે મામા બાલુભા જાડેજા, અર્જુનસિંહ અશોકસિંહ જાડેજા, અશોકના ભત્રીજા ભગીરથસિંહ દુર્ગાસિંહ જાડેજા અને શિવમસિંહ જાડેજાએ મગાવ્યો હોવાનું ફરિયાદમાં લખાવાયું છે. ટ્રકના ચાલક, માલિક અને શરાબ મોકલનાર અજાણ્યા શખ્સોને પણ આરોપી તરીકે દર્શાવાયાં છે. અશોક ઊર્ફે મામા અને તેના બેઉ ભત્રીજા પૂર્વ કચ્છના લિસ્ટેડ બૂટલેગરો છે.

અશોક ઊર્ફે મામા દર વખતે એક ખાસ ગંભીર બીમારીનું કારણ રજૂ કરીને કૉર્ટોમાંથી જામીન મેળવી લે છે. જામીન પર છૂટ્યાં બાદ ફરી ફરીને કરોડોનો શરાબ કચ્છમાં મગાવે છે.

અશોક અને તેના ભત્રીજાઓના શરાબ નેટવર્કના લીધે ભૂતકાળમાં અનેક વખત ભચાઉ અને ક્યારેક લોકલ ક્રાઈમ બ્રાન્ચના પીઆઈ, પીએસઆઈઓને સસ્પેન્શન કે સાઈડ પોસ્ટિંગમાં ટ્રાન્સફર થવાનો વારો આવેલો છે. આજે પણ અશોકનો માલ ઝડપાયાં બાદ પૂર્વ કચ્છ એસપીએ ભચાઉના પીઆઈ, પીએસઆઈ તથા એલસીબીના પીઆઈ સહિત ૧૫ પોલીસ ઈન્સપેક્ટર અને ૪ પોલીસ સબ ઈન્સ્પેક્ટરની જિલ્લામાં આંતરિક ફેરબદલ કરી છે.

પધ્ધર પોલીસ સ્ટેશનની હદમાંથી ચાર કરોડનો વિક્રમી દારૂનો જથ્થો ઝડપાવાના તેમજ તેના પગલે પધ્ધર પોલીસ સ્ટેશનના પીઆઈ, પીએસઆઈ સહિતના મહત્વના સ્ટાફ સામે સસ્પેન્સન અને બદલીની કરાયેલી કડક કાર્યવાહીના પ્રત્યાઘાતો હજુ શમ્યાં નથી ત્યાં ત્રણ દિવસની અંદર SMCએ ભચાઉમાં કરેલી રેઈડથી કચ્છના પોલીસ બેડામાં ખળભળાટ મચી ગયો છે. સામાન્ય રીતે, સ્ટેટ મોનિટરીંગ સેલની રેઈડ પડે એટલે સંબંધિત પોલીસ સ્ટેશનની બૂટલેગરો સાથેની મિલિભગત અથવા બેદરકારી સામે અંગુલિનિર્દેશ થતો હોય છે.

પંજાબ હરિયાણાની કેટલીક ડિસ્ટલરીઝવાળા પણ ‘સામ દામ દંડ ભેદ’ના કારણે માલ લઈને ગુજરાત જતી ટ્રકોની વિગતો લીક કરી દેતાં હોય છે.

પોલીસ ખાતાંના જ અમુક અનુભવીઓનું કથન છે કે પોલીસ કાંઈ ભગવાન નથી. કચ્છ પોલીસે પણ વિવિધ દરોડાઓમાં ૮૦ કરોડનો શરાબ ઝડપેલો છે. 

SMCના દરોડા બાદ સંબંધિત પોલીસ સ્ટેશનના અધિકારી કર્મચારીઓ સામે તરત કડક એક્શન લેવાના બદલે સ્થાનિક સ્તરે પુરતી તપાસ કરાયાં બાદ જેની બેદરકારી અથવા મિલિભગત સ્પષ્ટ થાય તેમની સામે કડક એક્શન લેવાય તો તે વધુ ન્યાયોચિત ગણાય તેવી લાગણી પણ કેટલાંક નિષ્ઠાવાન પોલીસકર્મીઓ વ્યક્ત કરી રહ્યાં છે.