છત્રીસ ક્વાર્ટર ચાર રસ્તા પાસે આજે સવારે સાડા નવના અરસામાં પૂરપાટ જતા ડમ્પરે એક્ટિવાને ટક્કર મારતા અલ્તાફ રફીક નોડે (ઉ.વ. ૧૯, રહે. સંજોગનગર, ભુજ)નું ગંભીર ઈજાથી મૃત્યુ નીપજ્યું હતું. એક્ટિવા પર સવાર તેના મિત્ર આસિફ સુલતાન લંગાને હળવી ઈજાઓ પહોંચી હતી. બેઉ જણ એક્ટિવા પર બકરીને લઈ જતા હતા તે બકરીનું પણ સ્થળ પર મૃત્યુ નીપજ્યું હતું.

ગત રાત્રે સાડા નવના અરસામાં ત્રિમંદિર સામે GJ-39 TA-7001 નંબરની ટ્રકે આગળ પલ્સર બાઈક પર ડીમાર્ટ તરફ જઈ રહેલાં  દિવ્ય રાજેશભાઈ મોતા (ઉ.વ. ૨૫, રહે. ગ્રીન એકર સોસાયટી, ખારી નદી ચાર રસ્તા, ભુજ)ને ટક્કર મારી હતી. રોડ પર પટકાયેલાં દિવ્યના કમર નીચેના અંગ પર ટ્રકનું આગળનું ટાયર ફરી વળતાં ડાબી સાથળ છુંદાઈ જતા ગંભીર ઈજા પહોંચી હતી. દિવ્ય હાલ સારવાર હેઠળ છે. બનાવ અંગે તેના પિતાએ આપેલી ફરિયાદના આધારે ભુજ એ ડિવિઝન પોલીસે ટ્રકચાલક વિરુધ્ધ ગુનો દાખલ કરી તપાસ હાથ ધરી છે.

માંડવીના વાંઢ ગામે પિતાએ રિવર્સમાં લીધેલી ગાડીના પૈડાં તળે દોઢ વર્ષનો પુત્ર જ ચગદાઈને મૃત્યુ પામ્યો હોવાનો કરુણ બનાવ બહાર આવ્યો છે. ગત સાંજે પાંચ વાગ્યાના અરસામાં દુર્ઘટના ઘટી હતી. જેમાં અસ્ફાક હમીદ ભટ્ટી નામના બાળકનું મોત નીપજ્યું હતું.

સામખિયાળી મોરબી હાઈવે પર જૂના કટારિયા ગામની સીમમાં સુમંગલમ્ કંપની નજીક અજાણ્યા વાહનની ટક્કરે અંદાજે ૩૫થી ૪૦ વર્ષની વયના યુવકનું સ્થળ પર જ મૃત્યુ નીપજ્યું છે. ગઈકાલે વહેલી સવારે આઠ વાગ્યાના અરસામાં બનાવ બહાર આવ્યો હતો. નજીકમાં ચાની કેબિન ધરાવતા કિશોર કોલીએ જણાવ્યું કે સવારે આઠ વાગ્યે તેની કેબિન નજીક રોડની સાઈડમાં અજાણ્યા યુવકની લાશ પડી હતી.

નજીકમાં પડેલાં ફોનના આધારે પરિચિતોનો સંપર્ક કરવામાં આવતા મૃતક ઉત્તરાખંડના બાગેશ્વરનો વતની ઓમરામ શિવરામ  હોવાનું સ્પષ્ટ થયું હતું. બનાવ અંગે રાત્રે મૃતકના કૌટુંબિક સંબંધીએ લાકડીયા પોલીસ મથકે અજાણ્યા વાહનચાલક વિરુધ્ધ ફરિયાદ નોંધાવી હતી.