પોર્ટના નેતૃત્વ, કર્મચારીગણ, ડૉક વર્કર્સ, ટ્રેડ યુનિયન્સ, પીપીપી ઓપરેટર્સ સહિતના સ્ટેકહોલ્ડર્સના યોગદાનની મદદથી કંડલા પોર્ટે આ અભૂતપૂર્વ ઐતિહાસિક સિધ્ધિ પ્રાપ્ત કરી છે.

પોર્ટ પ્રશાસને જણાવ્યું કે ગત વર્ષે દોઢસો મિલિયન ટન કાર્ગો હેન્ડલિંગની તુલનાએ આ વર્ષે ૧૬૦.૧૧ MMT કાર્ગો હેન્ડલ કરી વાર્ષિક સાત ટકાની વૃધ્ધિ કરી છે. ખાસ કરીને, ખાતરમાં ૩૨ ટકા, લિક્વિડ કાર્ગોમાં ૨૩.૪ ટકા અને કન્ટેઈનર કાર્ગોમાં ૫૪ ટકાની વૃધ્ધિ નોંધાઈ છે.

જો કે, આયર્ન અને સ્ટીલમાં ૪૩ ટકા, ક્લે (માટી)માં ૧૭ ટકા, ટીમ્બરમાં ૪.૩ ટકા, સોલ્ટમાં૧૨.૪ ટકા, વાડીનાર ખાતે ક્રૂડ અને પીઓએલમાં પાંચ ટકા તથા કોલમાં ૨.૮ ટકાનો ઘટાડો નોંધાયો છે. આ ખાધને ખાતર, લિક્વિડ અને કન્ટેઈનર કાર્ગોમાં વૃધ્ધિ સાથે સરભર કરીને પોર્ટે આ સિધ્ધિ હાંસલ કરી છે.

પોર્ટના આ ઐતિહાસિક સિમાચિહ્નની પોર્ટ તથા પ્રશાસનિક ભવન ખાતે ઉજવણી કરાઈ છે. આ પ્રસંગે શ્રમિકોને યુટિલીટી કીટની ભેટ અપાઈ છે. પોર્ટના ચેરમેન સુશીલકુમાર સિંઘે સૌ હિતધારકોના યોગદાનને સિધ્ધિનું શ્રેય આપીને જણાવ્યું કે આ માત્ર આંકડાકીય સિદ્ધિ નથી, પરંતુ સમગ્ર પોર્ટ કોમ્યુનિટીની અતૂટ પ્રતિબદ્ધતા, સુમેળ અને મક્કમતાનું પ્રતિબિંબ છે.

પ્રધાનમંત્રીના દૂરંદેશી નેતૃત્વ અને ભારતના દરિયાઈ ક્ષેત્રને પરિવર્તિત કરવા પરના તેમના ભાર હેઠળ, ડીપીએ (DPA) કંડલા એક મજબૂત, આત્મનિર્ભર અને વૈશ્વિક સ્તરે સ્પર્ધાત્મક મેરીટાઇમ ઇકોસિસ્ટમ બનાવવા માટે યોગદાન આપવા બદલ ગર્વ અનુભવે છે.