દરશડીનો ભાવસંગ ભગુભા જાડેજા અને ભુજના ચુનડી ગામનો રામસંગ દોલુભા જાડેજા ગાડીઓમાં ઈંગ્લિશ દારૂનો જથ્થો ભરીને હાલ દરશડી ગામે મફતનગર વિસ્તારમાં મોમાયમોરા તરફ જતા રસ્તે ઊભાં છે તેવી બાતમીના આધારે એલસીબીએ સ્થળ પર દરોડો પાડ્યો હતો.

સ્થળ પર પડેલી ક્રેટા અને બોલેરો કારમાંથી પોલીસે વિવિધ બ્રાન્ડની વ્હિસ્કી અને વોડકાની ૧૨.૭૫ લાખના દારૂની ૧૦૨૬ બાટલીઓ જપ્ત કરી હતી.

પોલીસે પાંચ પાંચ લાખની કિંમતની બેઉ કાર મળીને કુલ ૨૩ લાખ ૬૦૦ રૂપિયાનો મુદ્દામાલ જપ્ત કરી ત્રણે વિરુધ્ધ ગઢશીશા પોલીસ મથકે ફરિયાદ નોંધાવી હતી

પધ્ધર પોલીસે ઈકો કારમાં વ્હિસ્કીના ૨૧ હજારની કિંમતના ૧૦૫ ક્વાર્ટરીયા ભરીને લાખોંદ તરફ જઈ રહેલા માધાપર વર્ધમાનનગરમાં રહેતા હિરેન ઊર્ફે પપ્પુ છગન છેડા (રહે. મૂળ મોખા, મુંદરા)ને વૉચ ગોઠવી ઝડપી પાડ્યો હતો. પપ્પુ સુરતમાં રહેતા અજાણ્યા શખ્સ પાસેથી ક્વાર્ટરિયા ખરીદી લાવ્યો હતો.

ગાંધીધામ એ ડિવિઝન પોલીસે શહેરના સેક્ટર 1-એમાં ગુજરાત સ્ટેટ કો-ઓપરેટિવ બેન્ક સામે આવેલા ખુલ્લાં પ્લોટમાં પડેલી મારુતિ સ્વિફ્ટ કારમાંથી ૪.૧૬ લાખની કિંમતની વોડકા અને વ્હિસ્કીની ૩૭૨ નંગ બાટલીઓ કબજે કરી છે. સ્થળ પરથી કોઈ હાજર નહોતું.

ગાંધીધામ બી ડિવિઝન પોલીસે બાતમીના આધારે કિડાણા ગામે રામમંદિર પાછળ આવેલા લુહાણા વાસમાં રહેતા સંજયપુરી શિવપુરી ગોસ્વામીના રહેણાક મકાનમાં રેઈડ કરીને ૨૪ હજારની કિંમતના ઈંગ્લિશ દારૂની ૧૮ બાટલીઓ જપ્ત કરી સંજયની ધરપકડ કરી હતી.

ત્રીજી તરફ, લોકલ ક્રાઈમ બ્રાન્ચે કિડાણાના રાધેનગરમાં રહેતા લક્ષ્મણગીરી ગોવિંદગીરી ગોસ્વામીને ગવલાનો માણસ સ્વિફ્ટ કારમાં ઈંગ્લિશ દારૂની ડિલિવરી કરવા આવ્યો હોવાની બાતમીના આધારે દરોડો પાડ્યો હતો. જો કે, પોલીસને જોઈ ગવલાનો માણસ અને લક્ષ્મણ ગોસ્વામી બેઉ સ્થળ પરથી ફરાર થઈ ગયા હતા. પોલીસે લક્ષ્મણના ઘરની ગેલેરીમાંથી ૭૯ હજારની કિંમતના શરાબની ૬૦ બાટલી તથા એક મોપેડ કબજે કર્યું હતું.