પોલીસે ગહન પૂછપરછ કરતાં બહાર આવ્યું કે હરપ્રીતસિંઘ અગાઉ પણ માદક દ્રવ્યોના વેચાણના ગુનામાં પંજાબ પોલીસના હાથે ઝડપાયેલો છે. દોઢેક વર્ષ અગાઉ તે ફિરોઝપુરની જેલમાં હતો ત્યારે તેનો જોબનપ્રીત નામના અન્ય એક આરોપી સાથે પરિચય થયેલો. હરપ્રીત સાથે રોકાયેલો રામજશ ઊર્ફે રમેશ ગોદારા (બિશ્નોઈ) (ઉ.વ. ૨૫, રહે. જોધપુર, રાજસ્થાન) પણ માદક દ્રવ્યોના વેચાણના ગુનાનો આરોપી છે. રામજશ અગાઉ ભુજમાં કામ કરતો હોઈ ભુજથી પરિચિત હતો.

હરપ્રીતે ફિરોઝપુરથી સાબરમતિ રેલવે સ્ટેશનની ટ્રેન પકડેલી અને રામજશ બિકાનેરથી ટ્રેનમાં બેસી સાબરમતિ આવેલો. ગઈકાલે બેઉ પટેલ ટ્રાવેલ્સની બસમાં બેસીને ભુજ ઉતરીને ગેસ્ટ હાઉસમાં રોકાયેલાં. હરપ્રીતસિંઘે પંજાબથી ૧.૧૦ લાખ રૂપિયામાં હેરોઈન ખરીદેલું પરંતુ સરકારી ચોપડે ૧ ગ્રામ હેરોઈનની ૨૦ હજાર રૂપિયા કિંમત લેખે ૯૬.૫ ગ્રામ હેરોઈનનું મૂલ્ય ૧૯.૩૦ લાખ થઈ ગયું છે.